Jo 42 - BIBLIA - traduson antigu in Krioulo

Jo baŝa dianti di Deus

¹ Jo ruspundi SIÑOR, i fala:

² “N sibi kuma bu pudi fasi tudu; nin un di bu planus ka pudi mpididu.

³ Bu punta: ‘Es i kin ku na bidanta ña planu fusku ku palabras sin kuñisimentu?’ Na bardadi N papia di kusas ku N ka ntindi, kusas garandi dimas pa mi ku N ka pudi ntindi.

⁴ “Bu falan: ‘Sukutan, ami N na papia; N na puntau, bu na ruspundin.’

⁵ Ami N kunsiuba son pa kil ku N obi, ma gosi ña uju ojau.

⁶ E ku manda N njuti ña kabesa, N ripindi na reia ku sinsa.”

Deus raprindi amigus di Jo

⁷ Dipus ku SIÑOR kaba papia e palabra ku Jo, i fala Elifaz di Teman: “N ten raiba kontra bo ku bu dus amigu, pabia bo ka fala kusas retu aserka di mi, suma ña servu Jo.

⁸ Bo toma seti fiju di baka ku seti karnel macu, bo bai pa ña servu Jo, bo pursenta oferta kemadu pa bos. Ña servu Jo na ora pa bos; N na seta si orason, pa N ka trata bos konformi bo tulesa, pabia bo ka fala kusas retu aserka di mi suma ña servu Jo.”

⁹ Asin Elifaz di Teman, Bildad di Suá ku Zofar di Naama, e bai fasi konformi SIÑOR manda elis; SIÑOR bin seta orason di Jo.

Deus torna Jo si rikesa dobradu

¹⁰ Dipus ku Jo ora pa si amigus, SIÑOR muda si sorti; i dal dus bias mas di ki kil ki teneba.

¹¹ Tudu si ermons macu ku femia, ku tudu jinti ku tarda kunsilba, e bai falal manteña, e kume ku el na si kasa, e konsolal di tudu mal ku SIÑOR mandaba riba del. Kada kin dal diñeru ku anel di uru.

¹² SIÑOR bensua ultimu parti di vida di Jo mas di ki purmeru, pabia i bin tene katorzi mil karnel, seis mil kamelu, dus mil turu ku mil buru.

¹³ I teneba tambi seti fiju macu ku tris femia.

¹⁴ I coma nomi di purmeru fiju femia Jemima, sugundu i coma Kezia, terseru i coma Keren-Apuk.

¹⁵ Na tudu ki tera i ka tenba minjeris bonitu suma fijus di Jo. Se pape da elis yardansa na metadi di se ermons.

¹⁶ Jo vivi mas sentu i korenta anu; i oja si fijus, si netus ku si bis-netus.

¹⁷ Asin Jo muri ku bon bejisa, na idadi avansadu.