Jo 40 - BIBLIA - traduson antigu in Krioulo

¹ SIÑOR papia mas ku Jo, i puntal:

² “Nta kil ku diskuti ku kil ku ten tudu puder i na nsinal? Kil ku misti diskuti asin ku Deus, pa i ruspundi e kusas.”

³ Jo ruspundi SIÑOR, i falal:

⁴ “Ami N ka bali; ke ku N na ruspundiu? N pui mon na boka.

⁵ N papia un bias, N ka na ruspundi; dus bias ku N papia, ma N ka na papia mas.”

⁶ SIÑOR ruspundi Jo na metadi di turbada, i falal:

⁷ “Mara bu sintu suma omi; N na puntau; bu na ruspundin.

⁸ “Nta bu misti proba kuma N ka sedu justu? Bu na kondenan pa da bu kabesa roson?

⁹ Bu tene mon suma Deus? O bu pudi fasi baruju ku vos suma di sil?

¹⁰ Si i asin, faja ku bonitasku ku orgulyu, bu bisti ku garandesa ku gloria.

¹¹ Jubi pa tudu orgulyosus, bu bati elis; bu darma forsa di bu raiba.

¹² Sin, jubi pa tudu orgulyosus, bu baŝa elis; kalka jinti mau na kau ke sta nel.

¹³ Ntera elis tudu juntu na reia, bu sukundi se rostu na koba.

¹⁴ Asin ami N ta konfesa pa bo kuma bu mon direita i librau.

¹⁵ “Jubi diritu pa pis-kabalu ku N kumpu juntu ku bo; i ta kume paja suma turu.

¹⁶ Si forsa sta na si pe ku na muskulu di si bariga.

¹⁷ Si i misti, i ta balansa si rabu suma po di sedru. I ten forsa garandi na muskulus di si koŝa.

¹⁸ Si os i suma tubus di bronzi; si pernas e sedu suma baras di feru.

¹⁹ “Na tudu ku Deus kumpu, el ki mas tudu, ma Deus ku kumpul pudi bai pa el ku spada.

²⁰ Na bardadi, paja ta kirsi pa el na montis, nunde ku tudu limarias di matu ta brinka.

²¹ I ta dita bas di sombra di arvuris; i ta sukundi na lama na metadi di plantas di yagu.

²² Salgerus ku utru arvuris ta dal sombra, e rodial lungu di riu.

²³ Si riu inci tok i darma, el i ka ta turmenta; i ta fika ketu nin si riu Jordon inci te na si boka.

²⁴ Nta algin pudi pañal nkuantu i na ojal, o i pudi pañal ku armadilia, i fural naris?