Jo 4 - BIBLIA - traduson antigu in Krioulo

Elifaz raprindi Jo

¹ Elifaz di Teman ruspundi, i fala:

² “Si no osa papia ku bo, bu na pirdi pasensa? Ma kin ku pudi fika sin papia?

³ Abo bu nsinaba manga di jinti, bu da forsa pa kilis ku fraku.

⁴ Bu palabras lantanda kilis ku na kaiba, bu fortifika jujus fraku.

⁵ Ma gosi kansera yangasau, bu pirdi pasensa; bu sta tarpajadu.

⁶ Nta bu rispitu pa Deus i ka bu fiansa? Manera ku bu yanda na bardadi i ka bu speransa?

⁷ Pensa diritu. Algin ku ka ten kulpa i ciga di pirdi? O nunde ku bu oja jinti retu kabadu ku el?

⁸ Konformi kil ku N oja, jinti ku labra pekadu, e sumia mal, el ke na kebra.

⁹ Ku folgu di Deus e na pirdi; ku raiba ki na supra, e na kabadu ku el.

¹⁰ E pudi grita suma lion brabu, e pupa, ma dintis di lionsiñus ta kebradu.

¹¹ Lion beju ta pirdi pabia i ka paña nada di kume; fijus di lion ta pajiga.

¹² “Un bias rekadu bin pa mi na sigridu; ña oreja obi un fála pikininu.

¹³ Oca ku jinti na durmi fundu, N bin tene vison di noti.

¹⁴ I bin pa mi un medu ku spantu; ña osis tudu tirmi.

¹⁵ Un spiritu pasa dianti di ña rostu; ña kabelu lanta.

¹⁶ Ki spiritu para, ma N ka pudi sibi i ke. N oja un kusa suma algin ku sta ña dianti. N kala, N obi vos bas ku punta:

¹⁷ ‘Nta omi pudi sedu mas justu di ki Deus? I pudi sedu mas puru di ki kil ku kumpul?

¹⁸ Si Deus ka fiansa na si servus, si i oja kulpa na si anjus,

¹⁹ ku fadi kilis ku kumpudu ku lama, se alisersu sta na reia, e ta kebrantadu suma bicu!

²⁰ Omis pudi sta bibu parmaña, e pudi pirdi pa sempri antis di sol kai, sin ningin fasi kasu del.

²¹ Si fiu di se vida kortadu, e ta muri sin yangasa jiresa.’