Jo 38 - BIBLIA - traduson antigu in Krioulo

Deus ruspundi Jo

¹ Dipus di kila, SIÑOR ruspundi Jo na metadi di urdumuñu, i puntal:

² “Es i kin ku na bidanta ña planu fusku ku palabras sin kuñisimentu?

³ Mara bu sintu suma omi; ami N na bin puntau; bu na ruspundin.

⁴ “Nunde ku bu staba oca ku N pui alisersu di mundu? Kontan, si bu ten ntindimentu.

⁵ Kin ku fasil midida? Sertamenti bu sibi! Kin ku distindi korda riba del?

⁶ Ke ku si firkijas finka riba del? Kin ku koloka pedra di skina,

⁷ oca ku strelas di parmaña na kantaba juntu ku kontentamentu; tudu anjus di Deus na gritaba ku alegria?

⁸ “Kin ku fica porta riba di mar oca ki rebenta i sai na bariga?

⁹ N bistil ku nuvens, N mbuljal ku sukuru.

¹⁰ N marka si limitis, N pul portas ku trinkus.

¹¹ N falal: ‘Te li ku bu na ba ta bin; bu ka na pasa mas dianti; li ku forsa di bu maron na para.’

¹² “Nta disna ku bu padidu, bu ciga di da ordi pa sol mansi? O bu mostra mandrugada si lugar?

¹³ Bu falal pa i pega na pontas di mundu pa i sakudi jinti mau nel?

¹⁴ Lus di sol ta pui forma di mundu bida klaru, suma sinal di karimbu na lama.

¹⁵ Lus di jinti mau ta disvia delis; mon ku yalsadu ku orgulyu i ta kebrantadu.

¹⁶ “Bu yentra te na uju di mar? Bu pasia te na kau mas fundu del?

¹⁷ Algin mostrau portas di sombra di mortu?

¹⁸ Bu tene ideia sertu di largura di mundu? Kontan, si bu sibi.

¹⁹ “Nunde kamiñu pa morada di lus? Sukuru tambi, nunde ki ta mora nel,

²⁰ pa bu pudi lebal pa kau ki ta para nel, pa bu kunsi kamiñu pa si kasa?

²¹ Sertamenti bu sibi, pabia na ki tempu bu padiduba ja! Bu vivi manga di anu na tera!

²² “Nta bu ciga di yentra na armazen di nevi? O bu oja armazen di cuba di pedra

²³ ku N ta guarda te na tempu di foronta, pa dias di gera?

²⁴ Nunde kamiñu pa kau ku lus ta rapati; nunde ku bentu di saida di sol ta sai pa pasa pa tudu parti di mundu?

²⁵ Kin ku yabri baleta di seu pa tera pa yagu di cuba kuri nel? O kin ku yabri kamiñu pa raiu ku si baruju,

²⁶ pa cuba pudi regua con, te na lala nunde ku ningin ka sta?

²⁷ Ki cuba ta fartanda lala seku; i ta pui paja nobu pa i lanta.

²⁸ Nta cuba tene pape? Kin ku padi pingus di serenu?

²⁹ Na kal bariga ku jelu ku jeada ta sai?

³⁰ Yagu ta risu suma pedra; riba di mar i ta jela.

³¹ “Ki seti strela bonitu, bu pudi mara elis juntu? O bu pudi dismanca kordas di Orion?

³² Bu pudi pui grupus di strelas pa e sai na se tempu propi? O bu pudi gia Ursa ku si fijus?

³³ Bu kunsi leis di seu? Bu pudi pui na ordi si puder riba di tera?

³⁴ “Bu pudi yalsa bu fála pa nuvens, pa e pudi mojau ku manga di yagu?

³⁵ Bu ta da ordi pa raius pa e sai? E ta falau: ‘Alinu li’?

³⁶ Kin ku pui jiresa na korson, o kin ku da menti ntindimentu?

³⁷ Kin ku ten jiresa pa fasi konta di nuvens? O kin ku pudi jingi elis pa e darma cuba,

³⁸ ora ku con bida risu, padas di lama ta pega ŋutru?

³⁹ “Bu pudi montia limarias pa lion femia, o bu pudi fartanda fijus di lion

⁴⁰ ora ke dita, sukundidu, na se koba, e na montia?

⁴¹ Kin ku ta ranja kumida pa korvus ora ku se fijus na cora pa Deus, e na yanda-yanda ku falta di kumida?