Jo 37 - BIBLIA - traduson antigu in Krioulo

¹ “Pabia de kusas ña korson ta tirmi, i salta na si lugar.

² Bo para atenson, bo sukuta forsa di si vos, ki baruju di turbada ku ta sai na si boka.

³ I ta manda raiu pa tudu parti di seu; si lus ta bai te na kau mas lunju di mundu.

⁴ Dipus i ta somna ku garandi vos di turbada; ora ki obidu, i ka ta tarda, i ta manda mas raiu.

⁵ Ku si vos Deus ta fasi kusas ku ta dimira jinti; i ta fasi garandi kusas ku no ka pudi ntindi.

⁶ I ta fala nevi pa i kai na con, i ta fala cuba pa i kai ku forsa.

⁷ Asin i ta para mon di tudu omis pa e pudi rapara tarbaju ku el i ta fasi.

⁸ Limarias ta yentra na se kau di sukundi; e ta fika la na se kobas.

⁹ Turbada di bentu ta sai na si kuartu na sul; bentu di norti ta tisi friu.

¹⁰ Deus ta supra i fasi jelu; laguas ta bida jelu risu.

¹¹ I ta karga ki garandi nuvens ku umidadi; i ta spaja si raiu nelis.

¹² Asin, konformi ordi di Deus, ki nuvens ta pajiga na roda, e ta bai fasi tudu ki manda, na tudu parti di mundu.

¹³ Deus ta manda nuven pa disiplina jinti, o pa regua con, pa mostra si bondadi.

¹⁴ “Jo, mpina bu oreja, bu obi e kusas; bu pensa na milagris di Deus.

¹⁵ Nta bu sibi kuma ku Deus ta fasi tarbaju, manera ki ta pui relampagu pa i lampra na si nuvens?

¹⁶ Bu ntindi kuma ku ki nuvens garandi ta pindra la riba? Es i milagri di kil ki pirfitu na kuñisimentu.

¹⁷ O bu sibi kuma ku bu ropa ta pui pa bu kalura ora ku bentu di sul tisi kalur riba di con?

¹⁸ O bu judal distindi seu, ku sedu risu suma spiju di metal fundidu?

¹⁹ “Jo, nsinanu ke ku no na fala Deus! No sta na sukuru; no ka pudi purpara no kasu.

²⁰ Algin na konta Deus kuma i misti papia? Pa fasi asin, i suma i na pidi pa i ngulidu!

²¹ Omi ka pudi oja pa sol ku na lampra na seu, manera ku bentu pasa, i fika seu limpu.

²² Di norti sol ta ojadu, ku lus bonitu, kor di uru; Deus ta bin suma rei meduñu.

²³ Deus ku ten tudu puder, no ka pudi yangasal. El i garandi na puder; i ka ta kalka ningin na si justisa; i ta fasi tudu diritu.

²⁴ Pabia di kila, jinti ta rispital. El i ka ta jubi pa kilis ku pensa kuma e sedu jiru.”