Jo 36 - BIBLIA - traduson antigu in Krioulo

¹ Eliu kontinua i fala:

² “Ten pasensa mas un bokadu, N na mostrau kuma i ten inda mas argumentus pa fabur di Deus.

³ N tisi ña kuñisimentu di lunju; N na torna diklara kuma kil ku kumpun i justu.

⁴ Na bardadi, ña palabra i ka mintida. Dianti di bo i sta kin ku ten opinion sertu.

⁵ “Deus i garandi dimas, ma i ka ta njuti ningin; el i forti, i firmi di korson.

⁶ I ka ta disa omi mau ku vida, ma i ta trata ku justisa kilis ku maltratadu.

⁷ I ka ta tira si uju riba di justus, ma i ta yalsa elis, i pui elis pa e manda suma reis pa sempri.

⁸ Si jinti sta prezu na korenti, maradu ku kordas di kastigu,

⁹ Deus ta konta elis ke ke fasi, i ta mostra elis se pekadu ku se orgulyu.

¹⁰ I ta yabri se oreja pa avisus, i ta manda elis pa e konverti di se maldadi.

¹¹ Si e obil, e sirbil, e ta kaba se dias na sabura, se anus na kontentamentu.

¹² Ma si e ka obil, spada na mata elis; e na muri sin kuñisimentu.

¹³ “Ma finjidus di korson na guarda se raiba; mesmu ora ku Deus mara elis, e ka ta pupa pa sakur.

¹⁴ E ta muri na nobresa, e pirdi na metadi di omis di mau vida.

¹⁵ Kil ku na sufri, i ta libral di si sufrimentu; na si kastigu i ta papia na si oreja.

¹⁶ “Asin i na tirau na foronta, i lebau pa kau largu, nunde ku bu na sta libri; kumida di bu mesa na sabi.

¹⁷ Ma julgamentu di jinti mau sta riba di bo, julgamentu ku justisa na yangasau.

¹⁸ Toma sintidu pa ka ningin nganau ku rikesa; ka bu disa un suku di bas garandi disviantau.

¹⁹ Nta el i ta rispita bu rikesas, ku tudu sforsu di bu mon, pa i librau pa ka bu fika na foronta?

²⁰ Ka bu ten dipresa pa noti ciga, ku jinti na tomadu na se lugar.

²¹ Toma sintidu pa ka nklina pa pekadu, pabia i el ku bu mas misti di ki kastigu.

²² “Deus ta garandisidu na si forti puder; kin ku ta nsina suma el?

²³ Kin ku pudi kontal nunde ki na bai? O kin ku pudi falal: ‘Bu fasi mal’?

²⁴ Lembra di ngaba si tarbaju, ku omis ta ngaba ku kantiga.

²⁵ Tudu omis ojal; e ta jubil di lunju.

²⁶ Deus i garandi; no ka pudi ntindil; numeru di si anus ka pudi kalkuladu.

²⁷ “I ta junta pingus di yagu, i kumpul suma cuba.

²⁸ Nuvens ta tomal, e mandal ciu riba di omis.

²⁹ Nta algin pudi ntindi kuma ki distindi nuvens, o kuma ku baruju di turbada ta sai na si morada?

³⁰ I ta manda si relampagu riba di nuven, i ta kubri fundura di mar.

³¹ Ku e kusas i ta alimenta nasons, i ta da elis kumida ciu.

³² I ta inci si mon ku relampagu, i mandal pa i serta ku alvu.

³³ Baruju ta konta kuma turbada na bin; bakas tambi ta konta.