Jo 35 - BIBLIA - traduson antigu in Krioulo

¹ Eliu fala mas:

² “Nta bu ten diritu di fala kuma abo i justu dianti di Deus?

³ Pabia bu punta: ‘Kal purbitu ku N ten? Ke ku N ta ngaña si N ka peka?’

⁴ “N na dau rasposta, abo ku bu amigus.

⁵ Yalsa uju pa riba, bu jubi pa seu; jubi diritu pa ki nuvens altu ku sta riba di bo.

⁶ Si bu peka, kal mal ki ta fasi Deus? si bu buri bu maldadi, ke ku bu ta fasil?

⁷ Si abo i justu, kal purbitu ki ten pa el? Ke ki na risibi na bu mon?

⁸ I utru omis suma bo ku ta sufri di bu pekadu; elis tambi e ta purbita si bu fasi diritu.

⁹ “Manera ku jinti kalkadu, e na grita, e na pidi sakur kontra brasu forti di garandis.

¹⁰ Ma ningin ka ta punta: ‘Nunde ku Deus ku kumpun sta nel, kil ku ta da kantigas di noti,

¹¹ ku ta danu mas kuñisimentu di ki limarias di tera, i fasinu mas jiru di ki kacus ku ta bua?’

¹² E ta coma, ma el i ka ta ruspundi, pabia di orgulyu di jinti mau.

¹³ Na bardadi Deus ka na obi gritu di lebiandadi, kil ku ten tudu puder i ka na para sintidu nel.

¹⁴ Mesmu ku bu fala kuma bu ka na ojal, ma bu kasu sta si dianti; pera nel ku pasensa.

¹⁵ Gosi, suma ku Deus ka na kastiga ku raiba inda, nin i ka na pui sintidu ciu pa pekadu,

¹⁶ Jo yabri si boka amonton, i papia palabras sin i ka sibi ke ki na fala.”