Jo 34 - BIBLIA - traduson antigu in Krioulo

¹ Eliu fala mas:

² “Abos, omis jiru, bo obi ña argumentus; abos ntindidus, bo mpina bo oreja pa mi,

³ pabia oreja i ta purba palabra suma boka ku kumida.

⁴ Anos juntu, no ta kuji ke ki sertu, no ta rapara kil ki bon.

⁵ “Jo fala: ‘Ami i justu, ma Deus nega dan roson.

⁶ Nin ku N ten roson, N comadu munturus; N ka ten kulpa, ma ña caga ka pudi kuradu.’

⁷ Kal omi ku sedu suma Jo, ku ta bibi trosa suma yagu?

⁸ I ta yanda juntu ku jinti ku ta fasi mal, i sedu kamarada di omis mau.

⁹ I fala kuma nada omi ka ta purbita si i ta pui Deus kontenti.

¹⁰ “Asin, abos omis di ntindimentu, bo sukutan. Fasi mal i lunju di Deus. Fasi kusa injustu i lunju di kil ku ten tudu puder.

¹¹ I ta paga omi pa tarbaju ki fasi, i ta trata kada kin konformi si manera di yanda.

¹² Na bardadi Deus ka ta fasi kusas na un manera mau; kil ku ten tudu puder ka ta tursi justisa.

¹³ Kin ku ntregal puder? Kin ku nkargal tudu mundu?

¹⁴ Si Deus pui si korson kontra omi, i rukuji si spiritu ku si folgu,

¹⁵ jinti ku tene vida ta muriba tudu juntu; omi ta ribaba pa reia.

¹⁶ “Asin, si bu ten ntindimentu, obi es; bu mpina bu oreja, bu obi ke ku N na falau.

¹⁷ Nta kil ku ka gosta di justisa i na guberna? Bu misti kondena kil ki justu, i ten puder?

¹⁸ Algin ta fala rei: ‘Abo i mau’? O i ta fala ŝefis: ‘Abos bo ka bali’?

¹⁹ Ku fadi kil ku ka ta toma parti di ŝefis, nin i ka ta rispita riku mas di ki koitadi, pabia elis tudu i tarbaju di si mon.

²⁰ E ta muri me-noti, di repenti; jinti ta bulbulidu, e pasa; kilis ku ten puder e ta tomadu sin mon di omi.

²¹ “Si uju sta riba di kamiñu di kada kin, i na jubi tudu se pasus.

²² I ka ten kau sukuru, pa mas sukuru ki sedu, nunde ku kilis ku fasi mal pudi sukundi.

²³ Deus ka pirsisa pa omi lebadu si dianti pa justisa, pa i pudi jubil mas diritu.

²⁴ I ka pirsisa di punta di kasu pa i kebranta jinti ku ten puder, i pui utrus na se lugar.

²⁵ Suma ki sibi ke ke na fasi, i ta bati elis di noti, i kebranta elis.

²⁶ Pabia di se maldadi i ta kastiga elis na uju di tudu jinti,

²⁷ pabia e disvia del, e ka misti ntindi nin un di si ordis.

²⁸ Elis e puiba koitadis grita pa Deus; Deus obi manera ke na grita na se foronta.

²⁹ Si i kala, kin ku na kondenal? Si i kubri rostu, kin ku na ojal? Ma el i ten puder riba di un nason, tambi riba di un omi son,

³⁰ pa omi finjidu ka rena mas, pa nason ka pañadu na lastru.

³¹ “Un omi pudi fala Deus: ‘N ten kulpa, ma N ka na peka mas.

³² Nsinan kil ku N ka na oja. Si N fasi mal, nunka mas N ka na fasil.’

³³ Suma ku bu ta njuti ke ku Deus ta fasi, el i dibi di pagau konformi bu misti? Abo ku na disidi kila; i ka ami. Konta ke ku bu sibi.

³⁴ “Kualker omi jiru o jinti ntindidu ku na sukutan, e na falan:

³⁵ ‘Jo papia sin kuñisimentu; si palabras ka ten jiresa.’

³⁶ I bon pa Jo probadu te na kabantada, manera ki ruspundi suma omi mau!

³⁷ Riba di si pekadu i buri disobdiensia. I njutinu, i tokanu palmu, i buri si palabras kontra Deus.”