Jo 33 - BIBLIA - traduson antigu in Krioulo

Eliu raprindi Jo

¹ “Jo, obi ña kombersa, bu para sintidu na tudu ña palabras.

² Ali N na bai papia; ña palabra sta ja na ponta di lingua pa sai.

³ Ña palabras na sai na korson puru; N na papia kusas ku N sibi di bardadi.

⁴ I Spiritu di Deus ku kumpun, Deus ku ten tudu puder supran, i dan vida.

⁵ Ruspundin si bu pudi. Purpara bu argumentus pa pursenta.

⁶ Dianti di Deus N sedu suma bo; N kumpudu ku lama tambi.

⁷ Bu ka dibi di ten medu di mi, nin ña mon ka na sedu pisadu riba di bo.

⁸ “Na bardadi bu papia ña dianti; N obi bu palabras ku ña oreja.

⁹ Bu fala: ‘Ami N sta limpu, sin pekadu; N sta puru, N ka ten kulpa.

¹⁰ Ma Deus oja kualker falia na mi, i tenen suma si inimigu.

¹¹ I pui ña pe prezu, i ta nota tudu kau ku N bai.’

¹² “Ma ami N na ruspundiu, N fala kuma, ne kusa bu ka ten roson, pabia Deus i mas garandi di ki omi.

¹³ Ke ku manda bu na keŝa Deus kuma i ka ta da konta di nin un kusa ki na fasi?

¹⁴ Ma Deus ta papia, i torna papia mas; i son kuma ningin ka ta nota.

¹⁵ Na suñu o na vison di noti, ora ku omis na durmi un sonu fundu, na se kama,

¹⁶ Deus ta pui elis pa e obi, i ta pantanda elis ku si avisus,

¹⁷ pa lunjusi omi di si mau planu, pa libral di orgulyu,

¹⁸ pa salba si vida di spada, pa ka i bai pa koba.

¹⁹ O tambi Deus pudi kastiga algin ku duensa, tok i dita ku dur na os ku ka ta para.

²⁰ I ta nuju kumida; te ki kumida mas sabi, i ka ta mistil.

²¹ Kurpu kaba ku el tudu; si os, ku ka ta ojaduba, gosi i sai.

²² I pertu ja muri, pa bai pa koba.

²³ “Si un di ki milyaris di anju bin pa un omi, pa i sta entri el ku Deus, pa kontal ke ki dibi di fasi,

²⁴ i na ten pena del, i na fala: ‘Libral pa ka i ria na koba; N oja un libertadur.’

²⁵ Si kurpu na bida nobu suma ocal mininu; i na bida forti suma ocal rapas.

²⁶ I na ora; Deus na mostral fabur. I na oja rostu di Deus, i kanta ku kontentamentu; Deus na torna ojal justu.

²⁷ Ki omi na bai dianti di jinti, i fala: ‘N peka; N tursi kil ku seduba diritu; ma N ka kastigadu konformi N mersi.

²⁸ Deus libran di koba; N sta bibu, N na oja lus.’

²⁹ “Es tudu i kusa ku Deus ta fasi pa omi, dus bias, o te tris bias,

³⁰ pa libral di koba, pa numial ku lus di vida.

³¹ “Sukuta, Jo, bu kala, bu obin; ami N na papia ku bo.

³² Ma si bu tene un kusa di ruspundi, papia, pabia N misti dau roson.

³³ Si bu ka tene, kala, bu sukutan; N na nsinau jiresa.”