Jo 32 - BIBLIA - traduson antigu in Krioulo

Eliu raprindi Jo ku si amigus

¹ Ki tris omi para ruspundi Jo, pabia el i oja kuma i sedu algin justu.

² Eliu, fiju di Barakel, di jorson di Buz, di familia di Ran, i paña raiba kontra Jo pa manera ku kila na mostra kuma i mas ten roson di ki Deus.

³ I paña raiba tambi kontra ki tris amigu, pabia e ka oja manera di ruspundi Jo, ma inda e na kondenal.

⁴ Eliu peraba tok e kaba papia, pabia elis e mas el idadi.

⁵ Oca ki oja kuma ki tris omi ka tene mas palabra di papia, i paña raiba.

⁶ Asin Eliu, fiju di Barakel, di jorson di Buz, i fala: “Ami N nobu inda, abos bo tene ja idadi; e ku manda N medi, N ka osa konta bos ke ku N oja.

⁷ N fala: Garandis dibi di papia; jinti ku tene mas idadi e dibi di nsina jiresa.

⁸ Na bardadi i ten spiritu na omi, ku sedu folgu di Deus ku ten tudu puder; el ku ta dal ntindimentu.

⁹ I ka idadi ku ta pui algin jiru, nin i ka bejus ku ta ntindi kil ki retu.

¹⁰ “E ku manda N na fala bos: Bo obin, N ta konta bos ke ku N oja.

¹¹ N sukuta bos ku pasensa nkuantu bo na papia, N para sintidu na bo palabras oca bo na buska da rasposta.

¹² N pui sintidu na kil ku bo fala, ma nin un di bos ka pudiba konvensi Jo, nin ruspundi si argumentus.

¹³ Ka bo fala kuma bo oja jiresa. I Deus ku pudi konvensil, i ka omi.

¹⁴ Jo na papiaba ku bos, i ka ku mi; N ka na ruspundil suma ku bo ruspundil.

¹⁵ “E sta ntrumpidu, e ka pudi ruspundi mas, pabia palabra falta elis.

¹⁶ Nta N na pera inda, suma e ka na papia; e firma la, e ka na ruspundi mas?

¹⁷ Ami N na da ña rasposta; N na konta ke ku N oja,

¹⁸ pabia N tene manga di kusa di papia; ña spiritu na pincan.

¹⁹ Dentru di mi, palabras na rebenta, suma biñu nobu ku sta na saku di kuru.

²⁰ Bo dan lisensa pa N papia, pa N pudi alivia; N na yabri ña boka pa ruspundi.

²¹ N ka na diferensia jinti, nin N ka na ngaba ningin ku nganu.

²² N ka sibi ngaba ku nganu; si N fasiba kila, Deus ku kumpun ta leban kinti-kinti.