Jo 31 - BIBLIA - traduson antigu in Krioulo

¹ “N fasi kontratu ku ña uju; nta kuma ku N na pul na un bajuda?

² Kal kusa ku Deus ku sta la riba ta da omi? O kal yardansa ku ta bin di seu, di Deus ku ten tudu puder?

³ I ta manda pirdison pa kil ku ta yanda mal; i ta manda kastigu pa kilis ku fasi pekadu.

⁴ Nta Deus ka ta oja manera ku N ta yanda? i ka ta fasi konta di ña pasus?

⁵ “N ka yanda na mintida, nin ña pe ka ta janti pa nganu.

⁶ Deus ta pesan na balansu sertu; i na sibi kuma N tene korson di bardadi.

⁷ Si ña pe ta disvia di kamiñu, si ña korson bai tras di ña uju, si ña mon pega kualker pekadu,

⁸ nta, N ta sumia pa utru kume; tudu ña plantas e ta rinkadu te na rais.

⁹ “Si N disa ña korson atraidu pa minjer di ña kumpañer; si N bai montia na si porta,

¹⁰ nta, ña minjer ta pila pa utru omi; utru ta dita ku el.

¹¹ Es i ta sedu un kusa di borgoña ku N ten ku julgadu dianti di lei.

¹² I sedu fugu ku ta kema te na pirdison; i ta kaba ku tudu ña kebur.

¹³ “Si N nega fasi justisa pa ña kriadu macu o femia oca ki bin keŝa kontra mi,

¹⁴ ke ku N na bin fasi si Deus bin lanta? Si i puntan de kasu, ke ku N na ruspundil?

¹⁵ Nta kil ku kumpun na bariga, i ka kumpu ña kriadu tambi? O i ka el mesmu ku kumpunu na bariga?

¹⁶ “N ka tuji koitadis kil ke misti, nin N ka pui viuva pa i kansa pa pera ajuda.

¹⁷ N ka kume ña bokadu di kumida sin pati orfan.

¹⁸ Disna di ocan nobu, i kirsi ku mi; N sedu suma si pape; N gial disna ku N padidu.

¹⁹ “Si N oja algin ku ka tene nada, ku na muri ku falta di ropa;

²⁰ si i ka bensuan suma ku N kental kurpu ku kuru di ña karnel;

²¹ si N lantanda ña mon kontra orfan, suma ku N sibi kuma N pudi ngaña na kau di fasi justisa,

²² nta, ña brasu ta kai di ombra, i ta rinkadu na si lugar!

²³ Pabia kastigu di Deus i un kusa meduñu pa mi; suma N ka pudi nguenta si garandesa, N ka pudiba fasi kusas asin.

²⁴ “N ka pui ña speransa na uru, nin N ka fala uru finu: ‘Abo ki ña fiansa.’

²⁵ Ña kontentamentu i ka pabia N tene garandi rikesa, o pabia ña mon yangasa manga di kusa.

²⁶ Si N jubi pa sol suma ki na lampra, o pa lua ku na yanda na si bonitasku,

²⁷ N ka disa ña korson fika nganadu na sigridu; nunka N ka beẑa ña mon pa adora elis.

²⁸ Si N fasiba e kusas, i ta sedu pekadu ku na leban pa kau di justisa, pabia N nega Deus ku sta la riba.

²⁹ “N ka fika kontenti oca mufunesa bin pa algin ku odian, nin N ka ŋumini oca mal yangasal.

³⁰ Tambi N ka disa ña boka pa i peka, pa N maldisual, N pidi mortu pa el.

³¹ Omis ku ta tarbaja pa mi e ta fala: ‘A! Kin ku ka ciga di farta ku karni ku Jo ranja?’

³² Stranjeru ka ta pasaba noti na rua; ña porta staba sempri abertu pa ospris.

³³ N ka kubri ña pekadus suma Adon, N ka sukundi ña kulpa na korson,

³⁴ pabia di medu di juntamentu di jinti. Nunka N ka kala o N nega sai na porta pabia di medu di disprezu di familias.

³⁵ “Ai! Si N teneba algin ku na obin! Ali N skirbi ña difesa, N pui ña nomi. Deus ku ten tudu puder pa i ruspundin! Kin ku na keŝa kontra mi i dibi di skirbi si akusason.

³⁶ N ta lebal riba di ña ombra; N ta pul na kabesa suma koroa!

³⁷ N ta konta Deus tudu ku N fasi na ña vida; N ta ciga pa el suma fiju di rei.

³⁸ “Si ña con grita kontra mi, si si reguas na cora juntu;

³⁹ si N kume si frutu sin paga, N disa labraduris muri ku fomi,

⁴⁰ nta, i ta padi fidida ku paja brabu te pa i padi trigu ku sevada.” Palabras di Jo kaba.