Jo 30 - BIBLIA - traduson antigu in Krioulo

Jo fala di si sufrimentu

¹ “Ma gosi, jinti mas nobu di ki mi na rin. Se papes ka baliba nada, tok N ka mistiba pui elis pertu di kacuris ku ta bakia ña karnel.

² Forsa di se mon ka baliba pa mi, pabia e beju; se forsa kaba.

³ Fomi na kababa ku elis, e na ñeme rais seku di noti, na lala ku ka tene nada.

⁴ E ta rinka plantas di lala, e ta kume rais di zimbru.

⁵ E serkaduba na metadi di jinti ku pupa se tras suma e na serka ladron.

⁶ E ta mora na baletas, na kobas di con ku kobas di pedra.

⁷ E ta cora suma limarias, e junta bas di arvurisiñus ku tene fidida.

⁸ E seduba fijus di dudu ku ka teneba nomi; e serkadu na tera.

⁹ “Gosi N sedu kantiga di trosa pa elis; N sedu tambi ditu pa elis.

¹⁰ E ka pudi nguentan, e ta kuri di mi; e ka ta medi kuspin na rostu.

¹¹ Manera ku Deus tira korda na ña mansasa, i kalkan, e larga tudu se kontrolu ña dianti.

¹² Na ladu direita, manga di rapas junta pa ataka, e pincan, e purpara pa bin kaba ku mi.

¹³ E dana ña rua; e bin kaba ku mi, sin ningin ka juda elis.

¹⁴ E yentra na buraku garandi na mura, e na bin ku forsa kontra mi, na metadi di tudu danu.

¹⁵ Medu bin toma konta di mi; ña rispitu bai, suma kusa ku bentu bari; ña sabura pasa suma nuven.

¹⁶ “Gosi ña vida na kaba puku puku, dias di sufrimentu toma konta di mi.

¹⁷ Di noti, dur ta yentra na ña os; dur ku na murdin, sin para.

¹⁸ Ku forsa di ña duensa ña ropa muda. N ka pudi maral diritu, suma gola di ña kamisa.

¹⁹ I botan na lama; N bida suma reia ku sinsa.

²⁰ “O Deus, N ta comau, ma bu ka ta ruspundin. N ta firma, ma bu ka ta da atenson pa mi.

²¹ Bu bida mau pa mi; ku puder di bu mon bu ta atakan.

²² Bu ta yalsan riba di bentu, pa N monta, N yanda riba del; bu ta botan di un ladu pa utru na turbada.

²³ N sibi kuma bu na leban pa mortu, pa kasa di juntamentu ku tudu bibus na bai pa el.

²⁴ “Sertamenti ningin ka na distindi mon kontra un omi kebrantadu ora ki grita pa sakur na si foronta.

²⁵ Nta N ka cora pa kilis ku pasa mal? O ña korson ka fika tristi pabia di koitadis?

²⁶ Ma oca N na peraba ben, mal bin pa mi; N na peraba lus, ma i sukuru ku bin.

²⁷ Bariga na tursin sin para; dias di sufrimentu bin riba di mi, sin N spera.

²⁸ N na yanda ku peli pretu, ma i ka sol ku keman. N ta lanta na juntamentu, N pidi sakur.

²⁹ Gosi N sedu ermon di kacur brabu, kumpañer di avestruz.

³⁰ Ña peli bida pretu, ña os na kema ku febri.

³¹ Pabia di kila ña arpa bida miskiñu; ña flauta bida vos di kilis ku na cora.