Jo 3 - BIBLIA - traduson antigu in Krioulo

Jo keŝa

¹ Dipus di kila, Jo yabri boka, i maldisua dia ki padidu,

² i fala:

³ “Dia ku N padidu, pa i pirdi, ku ki noti ke fala: ‘I padi macu!’

⁴ Ki dia, pa i torna sukuru; Deus la riba pa ka i kuda di ki dia, nin pa lus ka numia riba del.

⁵ Pa i sedu un dia di sukuru ku sombra di mortu; pa nuvens sinta riba del, sukuru meduñu pa i toma konta del.

⁶ Ki noti, pa sukuru ngulil, pa ka i kontadu na metadi di dias di anu, nin na dias di mis.

⁷ Pa ki noti fika dingidu; pa musika ka obidu nel;

⁸ kilis ku sibi maldisua dias, ku sibi disperta Leviatan, pa e maldisua ki noti.

⁹ Pa si strela di fuska-fuska fika sukuru; lus di mandrugada ki na pera pa ka i bin; pa i ka ojadu purmeru raius di sol.

¹⁰ Ki noti, pa i maldisuadu pabia i ka fica porta di bariga, nin i ka tujin oja kansera.

¹¹ “Ke ku manda N ka muri na bariga, o N muri oca ku N na sai nel?

¹² Ke ku manda i tenba algin pa pegan, ku pitu pa mamantan?

¹³ Si N muriba, gosi N na ditaba ketu, N na durmiba; i na tenba diskansu pa mi,

¹⁴ juntu ku reis ku konsijaduris di mundu ku torna kumpu pa se kabesa kasas ku danaba ja.

¹⁵ N na ditaba ku ŝefis ku teneba uru, ku inci se kasas ku prata.

¹⁶ Ke ku manda N ka sukundidu na con suma mininu ku padidu mortu, suma kilis ku nunka ka oja lus?

¹⁷ La, jinti mau ka ta ŝatia; la, jinti kansadu ta diskansa.

¹⁸ La, katibus ta diskansa, e ka ta obi mas gritu di kil ku sta riba delis.

¹⁹ La i sta pikininu ku garandi; katibu sta libri di si dunu.

²⁰ “Ke ku manda folgu ta dadu pa algin di kasabi, o vida ta dadu pa jinti di spiritu disanimadu?

²¹ E na pera mortu, ma i ka bin pa elis; e na buskal suma jinti ku na koba pa buska rikesa ku sukundidu.

²² Si e bin ciga na kau di nteru, e na kontenti, e na jukuta ku pas.

²³ Ke ku manda folgu ta dadu pa omi ku Deus taja na tudu ladu, i ka disal oja kamiñu ku sta si dianti?

²⁴ Tristesa ta bin pa mi suma kumida; ña jimidura na darma suma yagu.

²⁵ Kusa ku N mediba bin kontisi ku mi.

²⁶ N ka ten pas nin susegu nin diskansu, ma son foronta.”