Jo 28 - BIBLIA - traduson antigu in Krioulo

Jiresa ngabadu

¹ “Na bardadi, prata tene kau nunde ki ta kobadu; uru tene kau nunde ke ta purifikal.

² Feru ta tiradu na con; pedra ta ribidu pa tira kobri.

³ Omis ta bai te na sukuru, e ta buska na kau mas fundu di con, e ta koba pedras na sukuru.

⁴ Lunju di kaus nunde ku jinti ta mora, kau ku pe di omi ka ta bai, e ta yabri entrada pa minas. Lunju di utru jinti e ta pindra na korda, e ta balansa di un ladu pa utru.

⁵ Con ku kumida ta sai nel i bida la bas suma fugu staba la.

⁶ Na si pedras i ta ojadu safira; reia ta jagasi ku uru.

⁷ Agias ka kunsi ki kamiñu pa mina, nin uju di falkon ka ojal.

⁸ Nin lion nin utru limaria brabu ka ta pui pe la.

⁹ Omi ta distindi mon pa kebra pedra mas risu; i ta koba te na rais di montis.

¹⁰ I ta koba kamiñu na pedra bas di con, i ta jubi tudu kusas di balur.

¹¹ I ta tapa nasenti di riu. Kil ku staba sukundidu na con, i ta tiral pa klaridadi.

¹² “Ma nunde ku jiresa ta ojadu? Nunde kau di ntindimentu?

¹³ Omi ka ta kunsi si balur; i ka ta ojadu na tera di bibus.

¹⁴ Mar fundu fala: ‘I ka sta na mi.’ Utru mar fala: ‘I ka sta ku mi tambi.’

¹⁵ I ka pudi kumpradu ku uru finu, nin prata ka ta pesadu pa torkia ku el.

¹⁶ I ka pudi kumpradu ku uru di Ofir, nin ku pedras di balur suma oniks ku safira.

¹⁷ I ka pudi komparadu ku uru nin kristal; i ka pudi torkiadu ku joia di uru finu.

¹⁸ I ta pui pa jinti diskisi koral ku pérolas; pa ngaña jiresa i minjor di ki ngaña rubins.

¹⁹ I ka pudi komparadu ku topaziu di Etiopia, nin i ka pudi kumpradu ku uru puru.

²⁰ “Nta nunde ku jiresa sai nel? O nunde kau di ntindimentu?

²¹ Nin un kriatura bibu ka pudi ojal, nin kacus ku na bua.

²² Pirdison ku mortu ta fala: ‘No obi si fama ku no oreja.’

²³ Deus ntindi kamiñu pa el; i sibi nunde ku si lugar sta,

²⁴ pabia i ta oja te na fin di mundu; i ta oja tudu ku sta bas di seu.

²⁵ Oca ku Deus rugula forsa di bentu, i midi yagu na mar,

²⁶ oca ki marka lei pa cuba, ku kamiñu pa relampagu ku si baruju,

²⁷ na ki tempu i oja jiresa, i jubil diritu, i proba si balur, i konfirmal.

²⁸ Deus fala omi: ‘Rispitu pa SIÑOR i jiresa; pa libra di fasi mal i ntindimentu.’ ”