Jo 27 - BIBLIA - traduson antigu in Krioulo

¹ Jo kontinua na si kombersa, i fala:

² “N jurmenta pa vida di Deus, kil ku nega fasin justisa, kil ku ten tudu puder, ku fasin kasabi na korson,

³ kuma, nkuantu N tene vida, ku folgu di Deus na naris,

⁴ ña boka ka na papia mal, nin ña lingua ka na tira palabra di nganu.

⁵ N ka na da bos roson; N ka na nega ña bardadi tok N muri.

⁶ N na pega na ña bardadi, N ka na largal. Ña konsiensia ka na raproban, nin un dia di ña vida.

⁷ “Ña inimigu pa i sedu suma omi mau; kil ku lanta kontra mi pa i sedu suma algin ki ka justu!

⁸ Kal ki speransa ku algin ku ka mporta ku Deus pudi ten ora ku Deus kaba ku si vida?

⁹ Nta Deus ta obi si gritu ora ku foronta bin riba del?

¹⁰ O i na kontenti ku Deus ku ten tudu puder? O i na coma Deus tudu tempu?

¹¹ “N na nsina bos aserka di puder di Deus; N ka na sukundi bos kal ki planus di Deus ku ten tudu puder.

¹² Ma abos tudu bo oja ja e kusas. Nta ke ku manda bo na papia palabras bakatela?

¹³ “Es i kusa ku Deus marka pa omi mau, yardansa ku jinti ku ta kalka utrus na risibi di Deus ku ten tudu puder.

¹⁴ I pudi tene manga di fiju, ma i pa spada. Si jorson, nunka se kumida ka na ciga elis.

¹⁵ Kilis ku sobra, duensa na ntera elis; se viuvas ka na cora.

¹⁶ Si omi mau monta prata suma puera, si i junta ropa suma monti di lama,

¹⁷ el i na rumal, ma i justus ku na bisti ki ropa, kil ku ka ten kulpa i ta rapati ki prata.

¹⁸ Omi mau ta kumpu si kasa suma di araña, o suma baraka ku guarda kumpu.

¹⁹ Riku pudi dita ku si rikesa; si i yabri uju, i ta oja si rikesa bai ja.

²⁰ Foronta ta bin riba del suma korenti di yagu; turbada ta rabatal di noti.

²¹ Bentu di saida di sol na lebal, i na tiral na si lugar ku forsa. Asin i na bai janan.

²² Deus na manda es riba del, i ka na ten pena del; omi na kuri ku foronta pa kapli na si mon.

²³ Ora ki kai, jinti na toka palmu kontra el; ora ki na sai na si lugar, e na subia.