Jo 26 - BIBLIA - traduson antigu in Krioulo

Jo fala di puder di Deus

¹ Jo ruspundi i fala:

² “Asin ku bu juda algin ku ka ten forsa! Asin ku bu fortifika mon ku sta fraku!

³ Es i konsiju ku bu da pa algin ku ka ten jiresa! Asin ku bu sibi mostral kuma ku kusa sta!

⁴ Kin ku bu na papia ku el? Spiritu di kin ku na papia na bo?

⁵ “Mortus na tirmi bas di yagu, ku kilis ku mora la.

⁶ Mundu di mortus sta nun si dianti, i ka kubridu.

⁷ I distindi seu di norti riba di spasu vaziu, i pindra mundu riba di nada.

⁸ I ta mara yagu dentru di nuvens, ma nuvens ka ta rebenta bas del.

⁹ I kubri rostu di lua ŝeia, i distindi si nuven riba del.

¹⁰ I marka orizonti riba di yagu pa i sedu frontera di lus ku sukuru.

¹¹ Ora ki ameasa firkijas di seu, e ta panta tok e tirmi.

¹² Ku si forsa i yabri mar; ku si ntindimentu i bati serpenti Raab.

¹³ Si mon mata ki serpenti ku na kapliba. I supra; seu bida klaru.

¹⁴ Es i son ponta di si puder. Kil ku no obi del i suma vos pikininu na oreja. Kin ku pudi ntindi baruju di si puder?”