Jo 24 - BIBLIA - traduson antigu in Krioulo

¹ “Suma ku tempus di julgamentu ka sukundidu di Deus ku ten tudu puder, ke ku manda kilis ku kunsil ka na oja ki dias?

² I ten jinti ku ta mundanta pedras di frontera di yardansas, e ta furta karnel, e bakia elis.

³ E ta leba buru di orfan, e ta toma turu di viuva tok kila paga si dibidas.

⁴ E ta serka koitadis na kamiñu, tok e ta kuri, e bai sukundi.

⁵ Suma buru di monti na lala, ki koitadis ta lanta sedu, e sai pa buska si e ta oja kusa di kume. Son lugaris ku ka labradu ku ta da kumida pa elis ku se fijus.

⁶ E ta korta paja pa limarias na un lugar ki ka di selis; e ta kuji uvas na orta di omi mau.

⁷ E ta pasa noti nun pa falta di ropa; e ka tene panu pa friu.

⁸ Cuba di montañas ta moja elis; suma e ka tene kau di mora, e ta ngosta na pedras garandi.

⁹ Omis mau ta rinka fiju pikininu na pitu di viuva, e ta toma fijus na mon di koitadi suma mpiñol.

¹⁰ Asin ki koitadis ta yanda nun, pa falta di ropa; ku fomi e ta karga arus di jinti mau.

¹¹ Na kintal di ki jinti e ta pirmi azeitonas pa tira azeiti. E ta masa uvas na kau ki ta masadu, ma e ka pudi bibi ki biñu, e ta fika ku sedi.

¹² Omis na jimi na prasas; jinti ku molostadu na grita, ma Deus ka ta akusa ningin di si pekadu.

¹³ “I ten jinti ku sta kontra lus; e ka kunsi kamiñu di lus, nin e ka ta yanda nel.

¹⁴ Mandrugada matadur ta lanta, i mata koitadis; di noti i ta bida suma ladron.

¹⁵ Kil ku misti dita ku minjer di utru i ta pera fuska-fuska, i ta kubri rostu, i fala: ‘Ningin ka na raparan.’

¹⁶ Na sukuru e ta romba kasas ke ta marka di dia; e ka misti nada ku klaridadi.

¹⁷ Pa elis tudu, parmaña i suma sombra di mortu, ma e ta fasi kamaradia ku kusas meduñu di di noti.

¹⁸ “E sedu suma sukuma riba di yagu; se con i maldisuadu; ningin ka ta yanda na kamiñu di se orta di uvas.

¹⁹ Sekura ku kalur ta kaba ku yagu di nevi; asin ku mortu ta fasi ku kilis ku peka.

²⁰ Mame na diskisi del; bicus na kumel ku gustu; nunka mas i ka na lembradu. Suma arvuri ta kortadu, asin ku omi mau na kortadu.

²¹ I ta maltrata minjer ku ka tene fiju, i ka ta fasi ben pa viuvas.

²² Deus ta rasta ku si forsa te omis di puder; si i lanta, e ka ta tene vida suguru.

²³ Si Deus da elis diskansu, e ta sinti suguru, ma si uju sta na se kamiñus.

²⁴ E ta yalsadu pa puku tempu; dipus e ta disparsi; e ta batidu, e juntadu suma pe di arus, e kortadu.

²⁵ Si i ka asin, kin ku na dismintin, pa i nula ña palabras?”