Jo 23 - BIBLIA - traduson antigu in Krioulo

Jo misti pursenta dianti di Deus

¹ Jo ruspundi i fala:

² “Mesmu aos N na keŝa ku kasabi; mon di Deus i forti riba di mi; N ka pudi fika sin jimi.

³ Si N sibiba nunde ku N na ojal, N pudiba ciga na si tribunal.

⁴ N ta inci ña boka ku palabras, N pui ña kasu si dianti na bon manera.

⁵ Asin N ta sibi ke ki na ruspundin, N ta ntindi ke ki na falan.

⁶ Nta i ta usa garandesa di si puder kontra mi? Nau, ma i ta toma konta di mi.

⁷ La un omi retu ta puiba si kasu dianti di Deus; ami N ta fika libri pa sempri di ña Juis.

⁸ “Si N bai dianti, i ka ta sta la; si N jubi tras, N ka ta ojal.

⁹ Si i na tarbaja na mon skerda, N ka ta kontra ku el; o si i sukundi na direita, N ka ta ojal,

¹⁰ ma el i sibi nunde ku N na bai; si i kaba proban, N na sai suma uru.

¹¹ Ña pe sigi si pasus; N pega na si kamiñu, N ka disvia del.

¹² Nunka N ka lunjusi di si mandamentus; N da palabras di si boka mas balur di ki ña kumida.

¹³ “Si i disidi fasi un kusa, kin ku na tujil? Kusa ki misti, el ki ta fasi.

¹⁴ I na bin fasi kil ki marka pa ña vida; i tene inda manga di utru planu na si sintidu.

¹⁵ E ku manda N ta fika tarpajadu si dianti; ora ku N pensa nes, N ta ten medu del.

¹⁶ I Deus ku pui ña korson pa i dismaja; kil ku ten tudu puder i pantandan.

¹⁷ I ka sukuru ku ta pui pa N dismaja, nin ki sukuru meduñu ku ta kubri ña rostu.