Jo 22 - BIBLIA - traduson antigu in Krioulo

Elifaz akusa Jo di pekadu

¹ Elifaz di Teman ruspundi i punta:

² “Nta kualker omi, nin si i jiru, i ten purbitu pa Deus?

³ O kil ku ten tudu puder i ten interes pa bu sedu justu? O i ta oja lukru si bu yanda sin kulpa?

⁴ “Nta i pabia di bu rispitu pa Deus ki ta raprindiu, i tisi keŝa kontra bo na justisa?

⁵ Nau! I pabia bu maldadi i garandi; bu pekadu ka ten limiti.

⁶ Bu toma kusa di bu ermon, bu mpiñal sin roson; bu tira ropa di jinti, bu disa elis nun.

⁷ Bu ka da yagu pa kilis ku sta kansadu, nin bu ka da kumida pa kilis ku tene fomi.

⁸ Bu seduba omi rispitadu, ma ku violensia bu toma tera, bu sinta nel.

⁹ Bu dispidi viuvas sin nada; bu kebra forsa di orfans.

¹⁰ E ku manda bu tajadu ku armadilias; di repenti bu ta sinti medu.

¹¹ Sukuru ta bin ku ta tujiu oja; korenti di yagu ta kubriu.

¹² “Deus sta la riba na seu; i ta jubi pa strelas bas del, kontudu, pa nos, strelas i altu.

¹³ Bu ta punta: ‘Ke ku Deus sibi? Nta el i pudi julga na metadi di sukuru?

¹⁴ Nuvens ta kubril, tok i ka pudi oja; el i ta pasia na roda di seu.’

¹⁵ “Nta bu misti yanda na kamiñu antigu ku omis mau yanda nel?

¹⁶ Elis e rabatadu antis di se tempu; korenti di yagu rasta se alisersu.

¹⁷ E ta falaba Deus: ‘Disanu!’ E ta punta: ‘Ke ku Deus ku ten tudu puder pudi fasinu?’

¹⁸ Ma i Deus ku inci se kasas ku rikesas! Ami, N ta sta lunju di konsiju di omis mau.

¹⁹ “Justus ta oja kastigu di omi mau, e ta kontenti; kilis ku ka ten kulpa e ta fasi trosa del,

²⁰ e fala: ‘Na bardadi no inimigu kabadu ku el; fugu na kaba ku restu di si rikesas.’

²¹ “Jo, bai pa Deus, bu fasi pas ku el; asin kusas ta bai diritu ku bo.

²² N na pidiu, seta si nsinamentu, bu pui si palabras na bu korson.

²³ Si bu konverti pa Deus ku ten tudu puder, bu na kumpudu. Tira tudu maldadi lunju di bu tenda.

²⁴ Bota bu uru na reia; bu uru di Ofir, botal na metadi di pedras di riusiñu.

²⁵ Asin Deus ku ten tudu puder i na sedu suma bu uru, suma manga di prata.

²⁶ Bu na sta kontenti ku Deus ku ten tudu puder, bu na yalsa rostu pa el,

²⁷ bu na papia ku el, i na obiu; bu na kumpri bu purmesa.

²⁸ Si bu tene planu pa un projetu, i na kuriu diritu; lus na lampra na bu kamiñu.

²⁹ Ora ku jinti batidu, bu na fala: ‘Pa e lantandadu!’ Deus na salba umildis.

³⁰ I na libra mesmu kil ku ten kulpa, pabia di puresa di bu mon.”