Jo 21 - BIBLIA - traduson antigu in Krioulo

Jo fala di sorti di jinti mau

¹ Jo ruspundi i fala:

² “Konsolason ku bo pudi dan i pa bo obi diritu ke ku N na fala.

³ Bo peran pa N papia. Si N kaba papia, bo pudi fasi trosa.

⁴ “Nta N na keŝa pa omi? N ka ten roson pa pirdi pasensa?

⁵ Bo jubi pa mi, bo fika dimiradu; bo pui mon na boka.

⁶ Si N pensa ne kusa, N ta fika tarpajadu; ña kurpu ta tirmi ku medu.

⁷ “Ke ku manda omis mau ta tene vida kumpridu? E ta beju, ma inda se forsa ta buri.

⁸ E ta oja se fijus na kirsi, e na kasa; e oja se netus tambi.

⁹ E ten pas na se kasas, sin medu; mantampa di Deus ka sta riba delis.

¹⁰ Se turus ta padi sin falia; se bakas ta tene fijus; bariga ka ta sai ku elis.

¹¹ Se fijus ta sai pa brinka suma kabritus; e ta jukuta, e baja,

¹² e ta kanta ku tambriña, ku arpa; e ta kontenti ku musika di flauta.

¹³ Tudu dia kusas ta kuri elis diritu; e ta muri diskansadu.

¹⁴ Ma e ta fala Deus: ‘Disanu; no ka misti kunsi bu kamiñu.’

¹⁵ E ta punta: ‘Kin ki Deus ku ten tudu puder, pa no sirbil? Ke ku no na purbita si no fasi orason pa el?’

¹⁶ Ma se vida di rikesa ka sta na se propi mon. Asin ami N ta fika lunju di konsiju di jinti mau.

¹⁷ “Kantu bias ku kanderu di jinti mau ta pagadu? Kantu bias ku mal ta bin riba delis ku Deus marka pa elis na si raiba?

¹⁸ Kantu bias ke ta lebadu suma paja dianti di bentu o di urdumuñu? Kuas nunka!

¹⁹ “Bo fala kuma Deus ta kastiga violensia di un omi na si fijus, ma i dibi di kastiga ki omi propi, pa i sinti.

²⁰ Si propi uju dibi di oja si kastigu; i dibi di bibi raiba di Deus ku ten tudu puder.

²¹ Ke ki na mporta ku fijus ki na disa dipus ku tempu ki dadu kaba?

²² “Nta algin pudi nsina Deus jiresa, kil ku ta julga kilis ku sta na lugar mas altu?

²³ Un omi ta muri ku si forsa ku rikesa, suguru, diskansadu.

²⁴ Si kurpu, tudu ku si os, ta sta forti, ben alimentadu.

²⁵ Utru ta muri ku kasabi na si korson, i ka ciga di purba bon kusa.

²⁶ E ta dita na con juntu, nunde ku bicus ta kubri elis.

²⁷ “Ami N sibi diritu ke ku bo na pensa, ku ki planus mau ku bo tene pa fasin.

²⁸ Bo na puntan: ‘Nunde kasa di ki ŝef? Nunde tenda ku omi mau moraba nel?’

²⁹ Bo ka ciga di punta kilis ku ta bai bias? Bo ka para sintidu na kusas ke konta?

³⁰ E ta fala kuma omi mau ta kapli na dia di kastigu, i ta libradu na dia di raiba.

³¹ Kin ku na bai akusal na manera ki na yanda? Kin ku na pagal kusas ki fasi?

^32-33 Na kabantada i ta lebadu pa koba; Tudu omis na bai si tras; garandi multidon na bai si dianti. Jinti ta bisia kau ki nteradu. Reia di kobon sabi pa el.

³⁴ “Nta kuma ku bo pudi konsolan ku palabras ku ka ten balur? Na bo raspostas, son mintida ku sta la.”