Jo 20 - BIBLIA - traduson antigu in Krioulo

Zofar konta aserka di kastigu di jinti mau

¹ Zofar di Naama ruspundi i fala:

² “Suma ña pensamentus na kansan, N ten ku janti pa ruspundi.

³ N obi manera ku bu raprindinu, N sinti suma bu faltan rispitu, ma N tene un spiritu di ntindimentu ku na ruspundi pa mi.

⁴ “Sertamenti bu sibi kuma ki sta disna di tempu antigu, disna ku omi pudu ne mundu.

⁵ Kontentamentu di jinti mau, ku finjiduris, i son puku tempu.

⁶ Mesmu ku si orgulyu ciga na seu, si kabesa bai te na nuvens,

⁷ i na pirdi ntidu suma kusa ku bentu leba. Kilis ku kunsil e na punta: ‘Nunde el?’

⁸ I na bua, i disparsi suma suñu, suma vison di di noti ku ka na ojadu mas.

⁹ Kilis ku ojal, e ka na torna ojal mas; i ka na ojadu mas na si kau.

¹⁰ Si fijus na buska fasi pas ku koitadis, e na torna elis se rikesa.

¹¹ Si kurpu ku inciba ku forsa di nobresa i na bin bida reia.

¹² “Mal ta mela na si boka; i ta sukundil bas di si lingua;

¹³ i ka pudi largal, ma i guardal na si boka.

¹⁴ Ma ki kumida na bida malgos na si stomagu, i na sedu suma venenu di kobra dentru del.

¹⁵ I nguli rikesa ma i na ramasal; Deus na tiral na si bariga.

¹⁶ I na cupa venenu di kobra; boka di vibura na matal.

¹⁷ I ka na oja rius ku riusiñus ku na darma mel ku mantega.

¹⁸ I na torna kil ki tarbaja pa el; i ka na kumel. I ka na goza lukru di si nogos.

¹⁹ I kalka koitadis, i disa elis sin nada; i roba kasas ki ka kumpu.

²⁰ “Si bariga ka dal tempu; ki rikesa ki pui sintidu nel, nada di kila ka na bin sobra.

²¹ Nada ka na sobra pa i kume; si rikesa ka na tarda.

²² Na tempu ki tene ciu kusas na si mon i na bin oja foronta. Tudu pesu di kasabi na bin riba del.

²³ Ora ki kaba inci bariga, Deus na manda forsa di si raiba riba del suma cuba.

²⁴ Nin si i kapli di material di gera, di feru, fleŝa di kobri na fural.

²⁵ I na rinka fleŝa na si kosta, ku na lampra ku si fel; garandi medu na toma konta del.

²⁶ Mal na pera pa bin riba di si rikesa sukundidu; fugu ku ka ta supradu na kaba ku el ku tudu ku fika na si tenda.

²⁷ Seu na mostra si maldadi; con na lanta kontra el.

²⁸ Korentis di yagu na leba rikesas di si kasa na dia di raiba di Deus.

²⁹ “Es i pagamentu di Deus pa omi mau; i yardansa ku Deus guarda pa el.”