Jo 2 - BIBLIA - traduson antigu in Krioulo

Sugundu proba di Jo

¹ Utru bias anjus di Deus bai pursenta dianti di SIÑOR. Satanas bai juntu ku elis pa bai pursenta.

² SIÑOR puntal: “Nunde ku bu sai nel?” Satanas ruspundi SIÑOR i falal: “N na daba volta di mundu, N na pasiaba nel.”

³ SIÑOR punta Satanas: “Bu nota pa ña servu Jo? I ka ten ningin na mundu ku parsi ku el. I omi di bardadi ku ta rispitan, i ta yanda diritu, i libra di fasi mal. El i guarda si bardadi te gosi, mesmu ku bu cucin kontra el, pa kastigal sin roson.”

⁴ Satanas ruspundi SIÑOR i falal: “Ma bu ka toka inda na si peli de! Omi ta da tudu ki tene pa guarda si vida.

⁵ Distindi bu mon, bu tokal na si kurpu ku os, bu jubi si i ka na kobau mal.”

⁶ SIÑOR fala Satanas: “Alal la! I sta na bu mon, ma ka bu tiral vida.”

⁷ Asin Satanas sai dianti di SIÑOR, i bai ataka Jo ku cagas ku sai na si kurpu desdi si pata di pe te na kabesa.

⁸ Jo sinta na sinsa, i toma padas di puti pa kosa ku el.

⁹ Si minjer falal: “Nta bu na guarda bu bardadi inda? Maldisua Deus, bu muri!”

¹⁰ Jo ruspundil: “Bu na papia suma dudu! Nta no na risibi ben di Deus, no ka na risibi mal?” Na tudu e kusas Jo ka peka kontra Deus ku si boka.

Tris amigu di Jo

¹¹ Jo teneba tris amigu ku seduba Elifaz di prasa di Teman, Bildad di tera di Suá, ku Zofar di tera di Naama. Oca ke obi tudu mal ku bin riba di Jo, kada kin sai na si lugar. E ruma pa kontra, pa bai juntu pa falal manteña, pa konsolal.

¹² Oca ke staba inda lunju, e ojal, e ka raparal. Dipus e yalsa se fála, e cora; kada kin rumpi si manta, i bota puera riba di si kabesa.

¹³ E sinta ku el na con seti dia ku seti noti, ma ningin ka falal nada, pabia e oja kuma si dur meduñu.