Jo 19 - BIBLIA - traduson antigu in Krioulo

Jo sibi kuma si Salbadur sta bibu

¹ Jo ruspundi i punta:

² “Te kal tempu ku bo na pun pa N fika tristi, bo na kebrantan ku palabras?

³ I fasi ja des bias ku bo na raprindin; bo ka ten borgoña pa abusa na mi.

⁴ Si na bardadi N yara, i na fika na mi.

⁵ Bo na yalsa kabesa kontra mi, bo toma ña kastigu suma proba di ña kulpa.

⁶ Ma bo dibi di sibi kuma i Deus ku tisi e mal pa mi. i tajan ku si ridia.

⁷ N ta grita: ‘Violensia!’ ma ningin ka obi. N coma pa sakur, ma justisa ka ten.

⁸ El i tajan kamiñu, N ka pudi pasa; i pui sukuru na ña kamiñu.

⁹ I roban ña rispitu, i tiran koroa na kabesa.

¹⁰ I kebran na tudu ladu, i rinka ña speransa suma arvuri.

¹¹ I sindi si raiba kontra mi, i tenen suma un di si inimigus.

¹² Si tropas junta e bin, e kumpu rampa di kamba kontra mi, e pui se tendas na ña roda.

¹³ “I pui ña ermons pa e lunjusi di mi; kilis ku kunsin e tenen suma algin strañu.

¹⁴ Ña parentis bandonan, ña amigus diskisi di mi.

¹⁵ Ña ospris ku ña bajudas di kasa e tenen suma stranjeru ke ka kunsi.

¹⁶ N ta coma ña kriadu; i ka ta kudin; ami propi N ten ku pidil fabur!

¹⁷ Ña minjer ka pudi nguenta ceru di ña boka; N torna nujenti pa fijus di ña mame.

¹⁸ Te mininus ta njutin; si N lanta, e ta fasin trosa.

¹⁹ N bida nujenti pa tudu ña amigus di korson; kilis ku N mas ama e vira kontra mi.

²⁰ Ña os na pega na ña peli ku karni; Kusasiñu ku pun pa N kapli ku vida.

²¹ “Bo sinti pena di mi, ña amigus! Bo sinti pena di mi, pabia mon di Deus toka na mi.

²² Ke ku manda bo na pirsigin suma Deus na pirsigin? Nin bo ka na kansa atakan!

²³ “I ta bon ba pa ña palabras skirbidu, pa e gravadu na rolu di libru!

²⁴ I ta bon ba pa e gravadu ku kaneta di feru ku cumbu na pedra, pa e fika pa sempri!

²⁵ N sibi kuma ña Libertadur sta bibu; na kabantada i na lanta i firma na mundu.

²⁶ Dipus ku ña peli kumedu, ami, na ña karni, N na oja Deus.

²⁷ Ami propi N na ojal; ña uju na ojal; i ka uju di utru algin. Ña korson na yardi dentru di mi ku diseẑu!

²⁸ “Si bo fala: ‘No buska manera di pirsigil, pabia rais di purblema sta nel,’

²⁹ abos propi bo dibi di medi spada, pabia raiba di Deus i ta tisi kastigu di spada, pa bo sibi kuma i ten algin ku ta julga.”