Jo 18 - BIBLIA - traduson antigu in Krioulo

Bildad papia di kastigu di jinti mau

¹ Bildad di Suá ruspundi i punta:

² “Te kal tempu ku bu na buri palabras? Pensa diritu; asin no ta papia.

³ Ke ku manda bu na tratanu suma limaria, bu na ojanu suma jinti ku kurtu sintidu?

⁴ Abo, bu na kastiga bu kurpu na bu raiba; nta mundu na bandonadu pabia di bo? O pedras garandi na tiradu na se lugar?

⁵ “Na bardadi, kanderu di omi mau na pagadu; ŝama di si fugu ka na yardi.

⁶ Lus na bida sukuru na si tendas; kanderu ku sta lungu del na paga.

⁷ Si pe forti na fraksi, si propi planus na batil.

⁸ Si propi pes na lebal kinti-kinti pa ridia, e na pañadu na si korda.

⁹ Armadilia na pañal na pe, i na prindil pa ka i kapli.

¹⁰ Korda sta sukundidu pa el bas di con; armadilia sta na si kamiñu.

¹¹ Kusas meduñu na pantandal na tudu ladu, e na serkal na tudu kau ki kuri pa el.

¹² I seduba riku ma i na bin tene fomi; danu na peral na tudu ladu.

¹³ Duensa na kaba ku partis di si kurpu; purmeru fiju di mortu na nguli elis.

¹⁴ I na rinkadu na si tenda ki fiansaba nel, i na lebadu pa rei meduñu.

¹⁵ Algin ku ka sedu si familia na mora na si tenda; nŝofri na wagadu la.

¹⁶ Bas, si raisis na seku; riba, si ramus na lati.

¹⁷ Si lembransa na pirdi na mundu; i ka na tene nomi na prasas.

¹⁸ E na tiral na klaridadi pa sukuru; e na serkal na mundu.

¹⁹ I ka na tene fiju nin netu na metadi di si pobu; ningin di si familia ka na fika bibu pa mora na si kau.

²⁰ Jinti di kaida ku saida di sol na fika spantadu ku medu pabia di si kastigu.

²¹ Na bardadi, kila ku na sedu kabantada di jinti mau, ku kilis ku ka kunsi Deus.”