Jo 16 - BIBLIA - traduson antigu in Krioulo

Jo akusa si kumpañeris

¹ Jo ruspundi i fala:

² “N obi ja manga di kusa suma es. Abos tudu i konsoladuris ku mas ta buri algin dur.

³ E palabras di bentu nunka e ka na kaba? Ke ku ta cuci bos pa bo papia de manera?

⁴ Si i abos ku staba ne kau ku N sta nel, N pudiba papia suma bos, N balansa kabesa, N buri palabras riba di bos.

⁵ Ma kusa ku N na fasiba, N na daba bos koraẑen; ña palabra di konsolason na kalma bo dur.

⁶ “Ma gosi, si N papia, ña dur ka na para; si N kala, i ka na kalma.

⁷ O Deus, bu tiran ña forsa, bu kaba ku tudu ña familia.

⁸ Bu pui ña peli nornori; ña magresa lanta i na testifika kontra mi.

⁹ “Na si raiba i pirsigin, i sapa-sapan; i ñeme dinti kontra mi; ña inimigu jubin ku odiu.

¹⁰ Jinti yabri boka pa fasin trosa, e dan bofotada ku disprezu, e junta tudu kontra mi.

¹¹ Deus ntregan na mon di jinti mau, i pun pa N kai na mon di kilis ku ka mporta ku Deus.

¹² Tudu staba ben ku mi, ma el i kebrantan, i pegan na garganti, i kalkan; i pun pa N sedu alvu pa si fleŝa.

¹³ Si jinti tajan ku mansasa. I furan na kosta, sin sinti pena; ña fel darma na con.

¹⁴ I ta bin pa mi ku kastigu riba di kastigu; i ta bin ku forsa riba di mi suma omi di gera.

¹⁵ “N kusi saku, N kubri kurpu ku el, N pui ña kabesa na reia.

¹⁶ N cora tok ña rostu fika burmeju; sombra di mortu na ronda ña uju,

¹⁷ ma ami N ka tene violensia na ña mon; ña orason i puru.

¹⁸ “O Con! Ka bu kubri ña sangi; ka bu da ña gritu kau di sukundi!

¹⁹ N sibi kuma ña tustumuña sta na seu; la riba i ten algin ku na difindi ña kasu.

²⁰ Ña amigus na fasin trosa; ña ujus na sai yagu dianti di Deus.

²¹ A! Si i ten algin ku pudi pidi Deus pa omi, suma ku un omi ta roga pa si amigu!

²² Pabia dentru di puku anus N na pega un kamiñu nunde ku N ka na riba nel.