Jo 15 - BIBLIA - traduson antigu in Krioulo

Elifaz akusa Jo

¹ Elifaz di Teman ruspundi i punta:

² “Nta omi jiru ta ruspundi ku kuñisimentu fufu? O i ta inci si bariga ku kalur di bentu di saida di sol?

³ I ta difindi ku palabra ku ka bali nada, o ku rosons ku ka ten purbitu?

⁴ Bu na pui rispitu pa Deus pirdi balur, bu na disinkoraẑa orason.

⁵ Bu boka na mostra bu pekadu; bu kuji lingua tortu.

⁶ I bu boka ku na kondenau, i ka ami; bu palabras na torna kontra bo.

⁷ “Nta abo bu sedu purmeru omi ku padidu? O bu kumpudu purmeru antis di montis?

⁸ Bu mati oca ku Deus na fasi planus na sigridu? I abo son ku ten jiresa?

⁹ Ke ku bu sibi ku anos no ka sibi? Kal ntindimentu ku bu ten ku ka sta na nos?

¹⁰ Tambi na no metadi no tene garandis di kabelu branku, mas beju di ki bu pape.

¹¹ Nta konsolason di Deus ka cigau? Bu ta njuti palabras sabi ku no papia pa bo?

¹² Ke ku manda bu korson rabatau tok fugu di raiba sta na bu uju?

¹³ Bu pui bu raiba vira kontra Deus; bu disa ki palabras sai na bu boka.

¹⁴ “Ke ki omi ku padidu na minjer pa i sedu puru i justu?

¹⁵ Si Deus ka ta fia na si anjus santu, nin seu i ka puru si dianti,

¹⁶ ku fadi omi ku sedu nujenti i kuruptu, ku ta bibi maldadi suma yagu?

¹⁷ “Sukutan, N na mostrau; kil ku N oja N na kontau.

¹⁸ Jinti jiru konta ke ke obi di se papes; e ka sukundi nada.

¹⁹ Tera dadu son pa elis; nin un strañu ka pasa na se metadi.

²⁰ Omi mau na sufri tudu si vida; omi kruel na sufri pa ki puku anu ki sobra.

²¹ Baruju meduñu sta na si oreja; mesmu na tempu di pas, bandidus ta bin pa el.

²² I ka fia si i na kapli di sukuru, pabia spada na peral.

²³ I ta yanda-yanda pa buska kumida, i punta: ‘Nunde ki sta?’ I sibi kuma dia di sukuru pertu ja.

²⁴ Dur ku foronta incil medu; e toma konta del, suma rei purparadu pa gera,

²⁵ pabia i lantanda si mon kontra Deus; i disafia kil ku ten tudu puder.

²⁶ I ntema, i bai ku forsa kontra el, ku tajadera gros si dianti.

²⁷ Si rostu ku tudu si kurpu inci gurdura.

²⁸ “I sinta na prasas danadu, na kasa ku ningin ka mora nel, ku staba kuas pa bida monton di liŝu.

²⁹ I ka na riku, nin si rikesa ka na tarda; kusas ki tene ka na laga na con.

³⁰ I ka na kapli di sukuru; ŝama di fugu na seka kusas ku lanta na si lugar; Deus na supra riba del, i rabatal.

³¹ Ka i fia na kusas ku ka bali, i ngana si kabesa, pabia si pagamentu na sedu ki kusas ku ka bali.

³² Antis di si dia ciga, i na kabadu ku el; si ramu ka na rebenta foja.

³³ I na sedu suma pe di uva ku si uvas verdi konkoñi, suma ku flor di olivera ta kai.

³⁴ Tudu jinti finjidu ka na padi; fugu na kaba ku tendas ku se dunus ta kumpu ku suku di bas.

³⁵ E ta ranja planus di malandrisa, e ta fasi mal; se korson ta purpara son nganu.”