Jo 14 - BIBLIA - traduson antigu in Krioulo

¹ “Omi ku minjer padi, i ta tene vida kurtu, incidu di kasabi.

² I ta sai suma flor, i ta lati; i ta pasa suma sombra, i ka ta tarda.

³ Nta bu ta pui bu uju pa un algin asin, bu pul pa i yentra bu dianti pa julgamentu?

⁴ Kin ku pudi tira kusa puru na un kusa ku ka puru? Ningin!

⁵ Dias di omi sta markadu; numeru di si misis sta na bo; bu pui limiti na omi ki ka pudi pasa.

⁶ Tira bu uju riba del, pa i pudi diskansa, tok i kaba si tempu ku kontentamentu, suma omi lugadu ku kaba si tarbaju.

⁷ “Arvuri ten speransa pabia, si i kortadu, i na torna lanta mas; i ka na para tira ramus nobu.

⁸ Si rais pudi bejusi na con, ki tronku ku sobra i pudi muri,

⁹ ma si i sinti ceru di yagu i ta rebenta si fojas, i ta larga ramus suma planta.

¹⁰ Ma si omi muri, si vida ta kaba; si i da si ultimu folgu, nunde ki sta nel?

¹¹ Suma yagu ta disparsi na lagua, riu ta seku,

¹² asin ku omi ta dita, i ka ta lanta. Tementi seu ka kaba, i ka na korda, nin i ka na disperta na si sonu.

¹³ “N misti son pa bu kubrin na mundu di mortus, pa bu sukundin la tok bu raiba pasa, bu dan prazu; dipus bu ta lembra di mi.

¹⁴ Nta si omi muri, i na torna bibu? Tudu dia di ña luta N na pera pa ña situason muda.

¹⁵ Asin bu ta coman, N ta ruspundiu; bu ta ten diseẑu pa mi suma ku bu kumpun.

¹⁶ Bu ta konta ña pasus, ma bu ka ta fasi konta di ña pekadus.

¹⁷ Kusas mau ku N fasi, bu ta fica elis na un saku; bu ta kubri ña maldadis.

¹⁸ “Suma ku monti ta fika i na gasta, suma pedra ku tiradu na si kau,

¹⁹ suma ku yagu ta gasta pedra, korenti ta rabata reia i lebal, asin bu ta pirdinti speransa di omi.

²⁰ Bu ta ngañal pa sempri; i ta pasa; bu ta muda si rostu, bu mandal pa i bai.

²¹ Si si fijus ngaña rispitu, el i ka ta sibi. Si e baŝadu, i ka ta oja.

²² El i ta sinti son dur di si propi kurpu; i ta cora son pa si kabesa.”