Jo 13 - BIBLIA - traduson antigu in Krioulo

¹ “Es tudu, N ojal ku ña uju; ña oreja obil; N ntindil diritu.

² Kil ku bo sibi, i el ku N sibi tambi; bo ka mas mi garandi.

³ N na fala ku Deus ku ten tudu puder; N misti difindi si dianti,

⁴ ma abos, bo ta kubri bardadi ku mintida; bo sedu medikus ku ka bali nada!

⁵ I bon ba pa bo kala di un bias; es i ta sedu bo jiresa!

⁶ Bo obi ña difesa; bo sukuta ña palabras diritu.

⁷ Manera ku bo na papia kusas tortu, nta bo misti difindi Deus ku mintida?

⁸ Bo na fasi skuju del? Bo na pursenta si kasu?

⁹ Nta si i jubiba bos diritu, i ta seduba bon pa bos? Bo pudi nganal suma ku kualker omi pudi nganadu?

¹⁰ Ku sertesa i na raprindi bos si bo na fasi skuju sukundidu.

¹¹ Nta bo ka ta panta pa si garandesa? Medu del ka ta kai riba di bos?

¹² Bo palabras sedu ditus di sinsa; bo difesas sedu di lama.

¹³ Bo kala, bo peran N papia; kualker kusa ku bin pa mi, N sta pruntu.

¹⁴ “N sta pruntu pa pui ña vida na pirigu.

¹⁵ Mesmu ki matan, N na pui ña speransa nel, ma N na difindi ña kasu si dianti.

¹⁶ Ña koraẑen pudi sedu ña salbason, pabia omi mau ka ta osa bai si dianti.

¹⁷ Bo para sintidu na ña palabras ku N na konta bos.

¹⁸ N purpara ja ña kasu, N sibi sertu kuma N na ojadu justu.

¹⁹ I ten algin ku pudi pui si keŝa kontra mi? Si i ten, N ta kala pa N muri.

²⁰ “O Deus, fasin e dus kusa; dipus N ka na sukundi di bo:

²¹ Tira bu mon lunju di mi; ka bu pantandan ku bu kastigu meduñu.

²² Coman, N na kudiu; o bu disan papia, bu ruspundin.

²³ Kantu kulpas ku pekadus ku N tene? Kontan lei ku N kebra.

²⁴ Ke ku manda bu sukundi bu rostu, bu tenen suma inimigu?

²⁵ Bu misti kastiga un foja ku bentu rabata, i leba? Bu na bai tras di paja seku?

²⁶ Bu na skirbi kusas ku kasabi kontra mi; bu na pun pa N yarda kusas mau ku N fasi na ña nobresa.

²⁷ Tambi bu pui ña pes pa e fika prezu, bu na nota tudu kau ku N bai, bu na jubi sinal di ña pe,

²⁸ mesmu ku ña kurpu na kaba ku mi suma kusa podri, suma ropa ku bagabaga kume.