Jo 12 - BIBLIA - traduson antigu in Krioulo

Jo difindi si kabesa

¹ Jo ruspundi i fala:

² “Na bardadi, abos son ki pobu! Si bo muri, jiresa na muri ku bos!

³ Ami tambi N tene kabesa suma bos; bo ka mas mi garandi. Kin ku ka sibi e kusas tudu?

⁴ “Ña amigus e ta rin, kontudu N ta comaba Deus; i ta kudin; N sedu justu i retu, ma e ta rin.

⁵ Kilis ku sta suguru e ta njuti sufrimentu ku na bati kil ku si pe na lalu.

⁶ Tendas di bandidus ta ten diskansu. Kilis ku ta lantanda raiba di Deus e sta suguru; Deus pui tudu na se mon.

⁷ “Punta limarias; kada un delis pudi nsinau; punta kacus; elis e ta kontau.

⁸ O papia ku con, i ta nsinau; te pis na mar ta kontau.

⁹ Nelis tudu, kal ku ka sibi kuma i mon di SIÑOR ku kumpu elis?

¹⁰ Vida di tudu kriatura bibu sta na si mon, ku folgu di tudu omi.

¹¹ Nta oreja ka ta purba palabras suma ku boka ta purba kumida?

¹² Jiresa sta ku jinti di idadi. Kil ku tarda na mundu i ta ten ntindimentu.

¹³ “Ma i Deus ku ten jiresa ku forsa; el ku ten konsiju ku ntindimentu.

¹⁴ Kil ki bati i ka na lantandadu; kil ki fica na kalabus i ka na largadu.

¹⁵ Si i tuji ku yagu, tudu na seku; si i larga yagu, i ta dana con.

¹⁶ I el ku ten forsa ku jiresa; kil ku yara ku kil ku pui utru yara, elis dus i di sil.

¹⁷ Konsijaduris, i ta roba elis se jiresa; i ta bidanta juisis tulu.

¹⁸ I ta dismanca kordas di rei, i ta maral sintu.

¹⁹ I ta tira saserdotis na se tarbaju; omis ku tarda ten puder, i ta kaba ku elis.

²⁰ I ta kalanta boka di konsijaduris di fiansa; i ta tira ntindimentu di garandis.

²¹ I ta tisi disprezu pa ŝefis; i ta tira puder di jinti forti.

²² I ta mostra kusas fundu na sukuru; i tisi sombra di mortu pa klaridadi.

²³ I ta garandisi nasons, i pui elis pirdi. I ta pajiga elis, i torna junta elis.

²⁴ I ta tira ntindimentu di ŝefis di nasons di mundu; i pui elis pa e yanda-yanda na lala ku ka tene kamiñu.

²⁵ E na yanda, e na palpa na sukuru, sin klaridadi. I ta pui elis e singa-singa suma camidur.