Jo 11 - BIBLIA - traduson antigu in Krioulo

Zofar akusa Jo

¹ Zofar di Naama ruspundi Jo i punta:

² “Nta rasposta ka na dadu pa e manga di palabra? Papia ciu i ta da roson me?

³ Jinti na kala pabia bu papia-papia mintida? Bu na fasi trosa sin ningin raprindiu?

⁴ Bu fala kuma bu pensamentu aserka di Deus i sertu, kuma bu sta limpu si dianti.

⁵ Ma na bardadi, i ta bon ba pa Deus yabri si boka kontra bo,

⁶ pa i fasiu sibi sigridus di jiresa, ku pudu na pratika na manga di manera. Bu dibi di sibi kuma Deus na kastigau menus di ki kil ku bu pekadu mersi.

⁷ “Bu pudi diskubri fundura ku limiti di garandesa di Deus ku ten tudu puder?

⁸ Si jiresa i altu suma seu; ke ku bu pudi fasi? I mas fundu di ki mundu di mortus; ke ku bu pudi sibi?

⁹ I mas kumpridu di ki mundu, mas largu di ki mar.

¹⁰ “Si Deus pasa, i prindi algin, i junta jinti na kau di justisa, kin ku pudi tujil?

¹¹ I ta rapara omis ku ka sta na bardadi. Si i oja pekadu, i ta nota pa el diritu.

¹² Omi tulu na bida jiru son ora ku buru di monti padi fiju mansu!

¹³ “Si bu purpara bu korson, distindi bu mon pa Deus.

¹⁴ Si pekadu sta na bu mon, fercal lunju di bo; ka bu disa mal pa i fika na bu tenda;

¹⁵ asin bu ta yalsa bu rostu sin borgoña, bu ta sta suguru, sin medu.

¹⁶ Bu na diskisi di bu sufrimentu, bu na lembra del son suma yagu ku pasa.

¹⁷ Bu vida na sedu mas klaru di ki me-dia; nin si sukuru ten, i na sedu suma parmaña.

¹⁸ Bu na sta suguru, pabia speransa na ten. Bu na jubi na bu roda, bu na diskansa suguru.

¹⁹ Bu na dita, ningin ka na pantandau. Manga di jinti na bin buska bu ajuda.

²⁰ Ma uju di jinti mau na funguli; se kau di suguransa na pirdi. Se speransa i son mortu.”