Jo 10 - BIBLIA - traduson antigu in Krioulo

¹ “N kansa ku ña vida; N ka na tuji ña keŝa pa i sai libri vontadi; N na papia ku kasabi na ña korson.

² N na fala Deus: Ka bu kondenan; kontan pa N sibi ke ku bu tene kontra mi.

³ Nta bu pensa i bon pa bu kalkan, bu nega algin ku bu kumpu ku bu mon, bu konkorda ku planus di jinti mau?

⁴ Bu tene uju suma di omi, pa bu pudi jubi kusas suma ku omi ta jubi?

⁵ Bu dias sedu suma di omi? Bu anus i suma di omi,

⁶ ku manda bu na buska sibi di ña maldadi ku pekadu?

⁷ Bu sibi kuma N ka ten kulpa, ma i ka ten kin ku na libran na bu mon.

⁸ “I bu mon ku kumpun, i forman; gosi bu misti kaba ku mi?

⁹ Lembra kuma bu kumpun ku lama; gosi bu misti bidantan reia.

¹⁰ Nta bu ka kambian suma liti? Bu ka pun pa N bida mas risu suma keẑu?

¹¹ Bu bistin ku peli ku karni, bu juntan ku os ku nervus.

¹² Bu dan vida, bu mostran bu bondadi; bu toma konta di mi, bu guardan ku vida.

¹³ “Ma bu teneba planu sukundidu na bu korson; gosi N sibi ke ku bu misti fasi.

¹⁴ Bu na jubin; si N peka, bu na nega purdan.

¹⁵ Si N fasi mal, ai di mi! Si N sedu justu, N ka osa yalsa ña kabesa; N burguñu dimas; N ta jubi pa ña kasabi.

¹⁶ Si N yalsa ña kabesa, bu ta montian suma lion brabu, bu torna fasi milagris kontra mi.

¹⁷ Bu ta tisi nobu tustumuñas kontra mi, bu ta buri bu raiba kontra mi; sempri bu na manda mal kontra mi.

¹⁸ “Ke ku manda bu tiran na bariga di ña mame? I ta bon ba pa N muri antis di algin ojan!

¹⁹ Asin N ta seduba suma nunka N ka staba na mundu. N ta tiraduba di bariga di ña mame, N lebadu pa koba.

²⁰ Nta ña dias ka sobra puku? Para, bu disan, pa N pudi ten pas,

²¹ antis di N bai pa kau ku N ka na riba del, ki tera di sukuru ku sombra di mortu,

²² tera di noti, fundu sukuru, tera di sombra di mortu ku kunfuson, nunde ku klaridadi propi i sukuru.”