Jo 1 - BIBLIA - traduson antigu in Krioulo

Rikesa di Jo

¹ Na tera di Uz i tenba un omi comadu Jo, un omi di bardadi ku rispita Deus, i yanda diritu, i libra di fasi mal.

² I padi seti fiju macu ku tris femia.

³ I teneba seti mil karnel, tris mil kamelu, mil turu ku kiñentus buru. I seduba omi mas riku na ladu di saida di sol, i teneba manga di tarbajadur.

⁴ Kada un di si fijus ta tene si dia di fasi festa pa elis tudu; e ta manda kumbida se irmas; e ta kume e bibi juntu.

⁵ Dipus di un tempu di festa, Jo ta coma si fijus, i purifika elis, i ta mandurga pa pursenta ofertas kemadu, konformi numeru delis tudu, pabia i ta fala: “Talves ña fijus fasi pekadu, e papia mal di Deus na se korson.” Asin ku Jo ta fasiba sempri.

Purmeru proba di Jo

⁶ Un dia, anjus di Deus bai pursenta dianti di SIÑOR; Satanas bai juntu ku elis.

⁷ SIÑOR punta Satanas: “Nunde ku bu sai nel?” Satanas ruspundi SIÑOR i falal: “N na daba volta di mundu, N na pasiaba nel.”

⁸ SIÑOR torna punta Satanas: “Bu nota pa ña servu Jo? I ka ten ningin na mundu ku parsi ku el. I omi di bardadi ku ta rispitan, i ta yanda diritu, i libra di fasi mal.”

⁹ Satanas ruspundi SIÑOR i puntal: “Nta Jo ta rispitau pa nada?

¹⁰ Bu ka pui tapada na roda del ku si familia ku tudu ki tene? Bu bensua si tarbaju, tok si limarias na buri ciu.

¹¹ Distindi bu mon, bu toka na tudu ki tene; bu jubi si i ka na kobau!”

¹² SIÑOR fala Satanas: “Jubi, tudu ki tene i sta na bu mon, ma Jo propi, ka bu pui mon riba del.” Satanas sai dianti di SIÑOR.

¹³ Un dia, fijus di Jo, macu ku femia, e na kume e na bibi biñu na kasa di se ermon garandi.

¹⁴ Algin bin pa Jo ku rekadu, i falal: “Turus na labraba, burus na kume lungu delis.

¹⁵ Di repenti sabeus bin riba delis, e leba, e mata tarbajaduris ku spada. Ami son ku kapli pa bin kontau.”

¹⁶ Oca ki na papiaba inda, utru bin i fala: “Fugu di Deus kai na seu, i kema karnel ku tarbajaduris, i kaba ku elis. Ami son ku kapli pa bin kontau.”

¹⁷ Oca kila na papia inda, utru bin i fala: “Kaldeus bin na tris grupu, e toma kamelus, e leba; e mata tarbajaduris ku spada. Ami son ku kapli pa bin kontau.”

¹⁸ Oca ki na papiaba inda, utru bin i fala: “Bu fijus macu ku femia e na kumeba e na bibi na kasa di se ermon garandi.

¹⁹ Un garandi turbada di bentu bin di ladu di lala, i suta kuatru kantu di kasa; kasa kai riba delis, e muri. Ami son ku kapli pa bin kontau.”

²⁰ Jo lanta, i rumpi si manta, i rapa si kabelu, i mborka na con, i ngaba Deus,

²¹ i fala: “Nun ku N sai na bariga di ña mame; nun ku N na disa e mundu. I SIÑOR ku dan; i el ku toma. Pa nomi di SIÑOR ngabadu!”

²² Na tudu es, Jo ka peka, nin i ka da Deus kulpa.