Bon Noba di Jesus Kristu ku Jon 9 - BIBLIA - traduson antigu in Krioulo

Jesus kura un omi ku padidu segu

¹ Jesus na pasa, i oja un omi ku padidu segu.

² Si disipulus puntal: “Rabi, kin ku peka pa es algin padidu segu? I el propi, o si papes?”

³ Jesus ruspundi elis: “I ka pabia di si pekadu o pekadu di si papes ku manda i segu, ma i sedu asin pa Deus pudi mostra si puder nel.

⁴ I pirsis pa N fasi tarbaju di kil ku mandan nkuantu i dia; noti na bin, ora ku ningin ka na pudi tarbaja.

⁵ Nkuantu N sta na mundu, ami i lus di mundu.”

⁶ Dipus di fala e palabra, i kuspi na con; ku si kuspiñu i fasi un lamasiñu, i untal na uju di ki segu,

⁷ i falal: “Bai, bu laba na lagua di Siloé” (ku signifika mandadu). I bai, i laba; dipus i riba; si uju yabri, i kumsa na oja.

⁸ Si visiñus ku jinti ku kunsilba ocal segu e punta: “Es i ka ki omi segu ku ta sintaba i na pidi simola?”

⁹ E ruspundi e fala: “I el propi.” Utrus fala: “I parsi nan ku el.” Omi fala: “I ami.”

¹⁰ E puntal: “Kuma ku bu uju yabri?”

¹¹ I ruspundi: “Ki omi comadu Jesus fasi lama, i untan na uju, i falan pa N bai laba na lagua di Siloé. N bai, N laba; ña uju yabri.”

¹² E puntal: “Nunde ki sta nel?” I ruspundi: “N ka sibi.”

¹³ E leba ki omi ku segu ba dianti di fariseus.

¹⁴ Oca Jesus fasi lamasiñu, i yabril uju, i seduba dia di diskansu.

¹⁵ Fariseus punta ki omi kuma ki yanda si uju yabri. Omi ruspundi elis: “I pun lama na uju; N laba, N kumsa na oja.”

¹⁶ Utru fariseus fala: “Ki omi ku fasi e kusa i ka di Deus, pabia i ka ta guarda dia di diskansu.” Utrus punta: “Kuma ku un omi mau pudi fasi e sinal?” Asin i kumsa na ten disavensa entri elis.

¹⁷ E torna punta segu: “Abo, ke ku bu ta fala di kil ku kurau?” I ruspundi: “I anunsiadur.”

¹⁸ Ŝefis di judeus ka fia kuma ki omi i segu ba, ma gosi i na oja, tementi e ka coma si mame ku si pape.

¹⁹ E punta elis: “E omi i bo fiju ku bo fala i padidu segu? Kuma ki na oja gosi?”

²⁰ Si pape ku mame ruspundi: “No sibi kuma e omi li i no fiju, i padidu segu,

²¹ ma no ka sibi kuma ki yanda i na oja gosi, o kin ku kural uju no ka sibi. El i garandi. Bo puntal; el propi i ta konta bos.”

²² Si pape ku si mame fala e kusas pabia e tenba medu di ŝefis di judeu, pabia ŝefis rumaba ja kuma, si algin diklara kuma Jesus i Mesias, i ta tujidu yentra na kasa di juntamentu.

²³ E ku manda pape ku mame di ki omi fala: “El i garandi; bo puntal el propi.”

²⁴ E coma pa sugundu bias ki omi ku segu ba, e falal: “Konta bardadi dianti di Deus. Anos no sibi kuma ki omi ta fasi mal.”

²⁵ Omi ruspundi: “Si el i ta fasi mal, ami N ka sibi. Ami N sibi son kuma, N segu ba ma gosi N na oja.”

²⁶ E torna puntal mas: “Ke ki fasiu? Kuma ki yabri bu uju?”

²⁷ I ruspundi elis: “N konta ja bos; bo ka obi. Pa ke ku bo misti torna obi mas? Abos sertamenti bo misti sedu si disipulus tambi!”

²⁸ Pabia di ki palabra e kobal, e falal: “Disipulu del i abo. Anos no sedu disipulus di Moisés.

²⁹ No sibi kuma Deus papia ku Moisés, ma es, nin no ka sibi i di nunde.”

³⁰ Ki omi ruspundi elis: “Ali ku purblema sta! Bo ka sibi el i di nunde, ma i el ku yabrin uju!

³¹ No sibi kuma Deus ka ta obi kilis ku ta fasi mal, ma i ta obi algin ku rispital, ku ta fasi si vontadi.

³² Disna di kumsada di mundu nunka ningin ka obi kuma algin yabri uju di kil ku padidu segu.

³³ Si ki omi ka sedu di Deus, i ka na pudi fasi nada.”

³⁴ Ŝefis di judeu ruspundil: “Abo bu padidu na pekadu, bu misti gora nsinanu?” E serkal na kasa di juntamentu.

Segu na spiritu

³⁵ Jesus obi kuma e serkal. Oca i kontra ku el i puntal: “Bu seta Fiju di omi?”

³⁶ I ruspundi: “El i kin, Siñor, pa N setal?”

³⁷ Jesus ruspundil: “Bu ojal ja. I el ku na papia ku bo.”

³⁸ Ki omi ruspundi: “N setau, Siñor.” I mpina, i adoral.

³⁹ Jesus fala: “Ami N bin e mundu pa julga, pa kilis ku ka ta oja pa e oja; kilis ku ta oja pa e bida segu.”

⁴⁰ Utru fariseus ku staba juntu ku Jesus e obi, e puntal: “Nta anos tambi no segu?”

⁴¹ Jesus fala elis: “Si bo segu ba, bo ka ta teneba pekadu, ma suma gosi bo na fala kuma bo na oja, e ku manda bo na fika ku bo pekadu.”