Bon Noba di Jesus Kristu ku Jon 8 - BIBLIA - traduson antigu in Krioulo

Minjer ku kiri omi ki ka di sil

¹ Jesus bai pa monti di Olivera.

² Parmaña sedu i riba pa kasa di Deus. Tudu jinti na binba nunde el; i sinta, i kumsa nsina elis.

³ Pursoris di lei ku fariseus tisi un minjer ku pañadu na kai cai.

⁴ E pul na metadi, e fala Jesus: “Mestre, e minjer pañadu na kai cai.

⁵ Moisés mandanu na lei pa e koldadi minjer matadu ku pedra. Abo gora, ke ku bu fala?”

⁶ E na falaba e kusa pa spurmenta Jesus, pa e pudi tenba manera di akusal. Jesus mpina, i na skirbi na con ku dedu.

⁷ Suma e ntema na punta, i lanta, i firma, i fala elis: “Na bos li, kin ku nunka ka peka i ta sedu purmeru ku na fercal ku pedra.”

⁸ I torna mpina, i na skirbi na con.

⁹ Oca e obi ki palabra, kada kin bai si kamiñu, desdi mas beju te nobu. Jesus fika el son ku ki minjer.

¹⁰ I lanta, i firma, i ka oja ningin si dianti fora di minjer. I puntal: “Minjer, nunde kilis ku akusau? Ningin ka kondenau?”

¹¹ Minjer falal: “Ningin, Siñor.” Jesus falal: “Nin ami N ka na kondenau. Bai, ka bu torna peka mas.”]

Jesus i lus di mundu

¹² Jesus torna papia ku jinti, i fala: “Ami i lus di mundu; kin ku ta sigin ka ta yanda na sukuru, ma i ta tene lus di vida.”

¹³ Fariseus falal: “Abo bu ta diklara di bo propi; bu tustumuñu i ka ten balur.”

¹⁴ Jesus ruspundi elis: “Inda ku N ta diklara di mi propi, ña tustumuñu ten balur, pabia N sibi di nunde ku N bin, N sibi tambi pa nunde ku N na bai, ma abos bo ka sibi di nunde ku N bin, nin pa nunde ku N na bai.

¹⁵ Abos bo ta julga julgamentu di omi, ma ami N ka ta julga ningin.

¹⁶ Si ami na bardadi N julga, ña julgamentu i bardadi, pabia i ka ami son ku ta julga, ma ami ku ña Pape ku mandan.

¹⁷ I sta skritu na bo lei kuma tustumuñu di dus jinti ku konkorda i ten balur.

¹⁸ Ami N ta konta di mi propi; ña Pape ku mandan tambi i ta testifika di mi.”

¹⁹ E punta Jesus: “Bu Pape, nunde ki sta nel?” Jesus ruspundi elis: “Bo ka kunsin, ku fadi ña Pape; si bo kunsinba, tambi bo na kunsiba ña Pape.”

²⁰ Jesus fala e palabra na lugar nunde ku kaŝa di oferta staba, oca i na nsina jinti na kasa di Deus. Ningin ka prindil, pabia si ora ka cigaba inda.

Kin ki Jesus?

²¹ Jesus fala elis utru bias: “Ami N na bai. Bo na bin buskan. Bo na muri na bo pekadu. Kau ku N na bai, bo ka pudi bai la.”

²² Ŝefis di judeu na puntaba: “Nta i misti mata si kabesa, manera ki fala kuma, kau ki na bai, no ka pudi bai la?”

²³ I fala elis mas: “Abos i di bas; ami i di riba. Abos i de mundu; ami N ka sedu de mundu.

²⁴ E ku manda N fala bos kuma bo na muri na bo pekadu, pabia si bo ka fia kuma N sedu kil ku N sedu, bo ta muri na bo pekadu.”

²⁵ E puntal: “Abo i kin?” Jesus fala elis: “Kil mesmu ku N konta bos disna di kumsada.

²⁶ N tene manga di kusa pa fala, pa julga bos aserka del, ma ki algin ku mandan i bardadi; kil ku N obi del, el ku N ta fala na mundu.”

²⁷ Elis e ka ntindi kuma i na fala elis ba aserka di Deus, si Pape.

²⁸ E ku manda Jesus fala elis: “Ora ku bo lantanda Fiju di omi, bo ta sibi kuma N sedu kil ku N sedu, kuma N ka ta fasi nada di mi propi, ma suma ku ña Pape ta nsinan, asin ku N ta fala.

²⁹ Kil ku mandan sta ku mi. I ka disan ami son, pabia N ta fasi sempri kusas ki gosta.”

³⁰ Oca Jesus fala e kusas, manga di jinti fia nel.

Katibus ku libris

³¹ Jesus fala ki ŝefis di judeus ku fiaba nel: “Si bo kontinua na ña palabra, bo ta sedu ña disipulus na bardadi.

³² Bo ta kunsi bardadi; bardadi ta liberta bos.”

³³ E ruspundil: “Anos i jorson di Abraon; nunka no ka sedu katibu di ningin. Kuma ku bu na fala kuma no ta sta libri?”

³⁴ Jesus ruspundi elis: “N na konta bos bardadi, tudu kil ku ta fasi pekadu i katibu di pekadu.

³⁵ Katibu ka ta fika pa sempri na familia, ma fiju, sempri i ta pertensi familia.

³⁶ Si Fiju liberta bos, di bardadi bo ta fika libri.

³⁷ Ami N sibi diritu kuma abos i jorson di Abraon, ma nin ku ’sin, bo na buska manera di matan, pabia ña palabra ka ta yentra na bos.

³⁸ N ta papia di kusas ku N oja juntu di ña Pape; abos bo ta fasi kusas ku bo pape nsina bos.”

³⁹ E ruspundi e falal: “No pape i Abraon.” Jesus fala elis: “Si bo seduba fijus di Abraon, bo ta fasiba kusas ku Abraon fasi.

⁴⁰ Gosi bo misti matan, ami omi ku fala bos sempri bardadi ki obi di Deus. Abraon ka ta fasiba asin.

⁴¹ Abos bo fasi kusas suma ku bo pape fasi.” E falal: “Anos no ka sedu fijus sin pape; no tene son un Pape ki Deus.”

⁴² Jesus fala elis: “Si Deus seduba bo Pape, na bardadi bo na amanba, pabia ami N bin di Deus, N ka bin di mi propi, ma i el ku mandan.

⁴³ Ke ku manda bo ka ntindi kil ku N fala? I pabia bo ka pudi nguenta ña palabra.

⁴⁴ Abos, bo pape i diabu; bo misti fasi si vontadi. El i matadur disna di kumsada. Nunka i ka sikidu na bardadi, pabia bardadi ka sta nel. Ora ki na konta mintida, i ta konta di kil ki sedu propi, pabia i munturus; i pape di mintida,

⁴⁵ ma pabia N ta fala bos bardadi, bo ka fia na mi.

⁴⁶ Kin na bos ku ta konvensin di pekadu? Si N fala bos bardadi, pabia di ke ku bo ka fia?

⁴⁷ Kin ki di Deus i ta sukuta palabra di Deus. Ke ku manda bo ka ta sukutal i pabia abos i ka di Deus.”

⁴⁸ Ŝefis di judeu ruspundi e puntal: “No ka ten roson di fala kuma abo i samaritanu, bu tene dimoniu?”

⁴⁹ Jesus ruspundi: “Ami N ka tene dimoniu. N ta rispita ña Pape, ma abos bo lebsin.

⁵⁰ Ami N ka na buska ña gloria, ma i ten kil ku na buskal; i el ku ta julga.

⁵¹ N na konta bos bardadi, kin ku obdisi ña palabra i ka ta muri.”

⁵² Ŝefis di judeu falal: “Gosi no sibi kuma bu tene dimoniu. Abraon ku anunsiaduris e muri; abo gora bu fala kuma, kin ku obdisi bu palabra, nunka i ka ta muri.

⁵³ Nta abo bu mas garandi di ki no pape Abraon ku muri? Tambi anunsiaduris muri! Kin ku bu misti sedu propi?”

⁵⁴ Jesus ruspundi elis: “Si N ta glorifika ña kabesa, ña gloria i ka ten balur. Kin ku ta glorifikan i ña Pape, kil ku bo ta fala kuma i bo Deus.

⁵⁵ Abos bo ka kunsil, ma ami N kunsil. Si N fala kuma N ka kunsil N ta sedu munturus suma bos, ma N kunsil; N ta fasi kil ki ta falan.

⁵⁶ Abraon bo pape sinti garandi alegria oca N na bin; i ojan, i kontenti.”

⁵⁷ Judeus puntal: “Bu ka tene inda sinkuenta anu, bu fala kuma bu oja Abraon?”

⁵⁸ Jesus fala elis: “N na konta bos bardadi, antis di Abraon padidu, ami N sedu.”

⁵⁹ E paña pedra pa dal ku el, ma Jesus sukundi, i sai na kasa di Deus.