Bon Noba di Jesus Kristu ku Jon 5 - BIBLIA - traduson antigu in Krioulo

Kura di un manku di Betesda

¹ Dipus de kusas Jesus bai pa Jerusalen pa mati un festival di judeus.

² I tenba na Jerusalen, pertu di porton di karnel, un pisina ku ta comadu Betesda na lingua ebraiku. I tenba sinku baranda na roda del.

³ Manga di duenti ta staba na ki barandas, segus ku mankus ku kilis ku ka pudi bulbuli kurpu. [E na peraba pa yagu bulbulidu,

⁴ pabia un anju ta dati i ria na pisina, i ta bulbuli yagu; purmeru duenti ku riaba la dipus di yagu bulbulidu i ta fika kuradu di kualker duensa ki tene.]

⁵ I staba la un omi ku staba duenti trinta i oitu anu.

⁶ Jesus oja ki omi ditadu; i sibiba kuma i tardaba asin; i puntal nos i misti san.

⁷ Ki duenti ruspundil: “Siñor, N ka tene ningin pa mitin na yagu ora ki bulbulidu, ma ora ku ami N na rasta pa bai la, utru ta jumnan, i ta ria.”

⁸ Jesus falal: “Lanta, bu lambu bu kama, bu yanda.”

⁹ Na ki ora, omi fika kuradu, i lambu si kama, i bai. I seduba dia di diskansu.

¹⁰ Ŝefis di judeu fala ki omi ku kuraduba: “Aos i dia di diskansu; bu ka dibi di karga kama.”

¹¹ I ruspundi elis: “Kil ku kuran, el propi ku falan pa N lambu ña kama, N yanda.”

¹² E puntal: “Kal omi ku falau pa bu lambu bu kama, bu yanda?”

¹³ Ki omi ku kuradu ka kunsiba kin ku kural, pabia Jesus pirdiba na metadi di manga di jinti ku staba la.

¹⁴ Dipus, Jesus bin kontra ku el na kasa di Deus, i falal: “Jubi, bu sta ja kuradu; ka bu peka mas, pa ka kusa pior bin kontisi ku bo.”

¹⁵ Ki omi bai konta ŝefis di judeu kuma i seduba Jesus ku kural.

¹⁶ E ku manda ŝefis di judeu kumsa na pirsigi Jesus, e na buska matal, pabia i fasi e kusas na dia di diskansu.

¹⁷ Jesus ruspundi elis: “Ña Pape na tarbaja te gosi; ami N na tarbaja tambi.”

¹⁸ Pabia de palabra ŝefis di judeu e mas na buska matal; i ka son kuma Jesus ta kebraba dia di diskansu, ma i ta fala tambi kuma Deus i si Pape; asin el i juntu ku Deus.

Otridadi di Fiju di Deus

¹⁹ Jesus ruspundi elis: “N na konta bos bardadi kuma, Fiju, el son, ka pudi fasi nada si i ka oja si Pape fasil, pabia tudu kil ku Pape fasi, Fiju tambi ta fasil.

²⁰ Ña Pape ama si Fiju, i mostral tudu ki na fasi. I na bin mostral manera di fasi kusas mas garandi di ki es, ku bo ta fika dimiradu.

²¹ Suma ku Pape ta lantanda mortus, i da elis vida, asin tambi ku Fiju ta da vida pa kilis ki misti da.

²² Ña Pape ka ta julga ningin, ma i da si Fiju puder pa julga,

²³ pa tudu jinti pudi rispita Fiju suma ke rispita si Pape. Kin ku ka rispita Fiju, i ka ta rispita si Pape ku mandal.

²⁴ “N na konta bos bardadi, kin ku obi ña palabra, i seta kil ku mandan, i ta tene vida ku ka ta kaba. I ka na kondenadu, ma i pasa ja di mortu pa vida.

²⁵ N na torna konta bos bardadi kuma, ora na bin, i ciga ja, ku mortus na obi vos di Fiju di Deus; kilis ku obil e ta bin tene vida.

²⁶ Suma ku ña Pape i fonti di vida, i da tambi si Fiju puder di sedu fonti di vida.

²⁷ I dal puder di julga jinti pabia i Fiju di omi.

²⁸ Ka bo dimira. I na ciga ora ku tudu mortus ku nteradu na obi si vos; e na sai na koba.

²⁹ Kilis ku fasi ben e na lanta pa vida; kilis ku fasi mal e na lanta pa kondenason.

³⁰ “Ami na ña forsa N ka pudi fasi nada; suma ku N obi, asin ku N ta julga. Ña juisu i justu, pabia N ka misti fasi ña vontadi, ma vontadi di ña Pape ku mandan.

³¹ Si N na diklara ña kabesa, ña tustumuñu i ka ten balur.

³² I ten utru ku diklara di mi; N sibi kuma tustumuñu ku el i da di mi i bardadi.

³³ Abos bo manda jinti nunde Jon; el i konta kil ki bardadi.

³⁴ I ka suma N pirsisa di tustumuñu di omi, ma N fala bos e kusas pa bo pudi salba.

³⁵ Jon seduba kanderu ku na yardiba, i numia; abos bo misti alegra un bokadiñu di tempu ku si lus.

³⁶ Ma N tene tustumuñu mas garandi di ki kil di Jon, pabia kusas ku ña Pape dan pa N fasi, ki mesmu kusas ku N fasi ta diklara di mi kuma i ña Pape ku mandan.

³⁷ Ña Pape ku mandan, el propi i ta diklara di mi. Abos nunka bo ka obi si vos, nin bo ka oja si parsensa.

³⁸ Si palabra ka sta sempri na bos pabia bo ka seta ki algin ki manda.

³⁹ Bo ta studa Skritura ku atenson, pabia bo pensa kuma bo tene vida nel ku ka ta kaba, ma i el propi ku ta diklara di mi.

⁴⁰ Inda asin bo ka misti bin pa mi pa bo tene vida.

⁴¹ “Ami N ka ta buska pa omis ngaban.

⁴² N kunsi bos diritu; bo ka ten amor di Deus na bo korson.

⁴³ Ami N bin na nomi di ña Pape; bo ka setan. Si utru bin na si nomi propi, bo ta setal.

⁴⁴ Kuma ku bo pudi setan si bo na risibi rispitu di ŋutru, bo ka na buska rispitu ku bin di kil ki uniku Deus?

⁴⁵ Ka bo pensa kuma ami N na bin akusa bos dianti di ña Pape. I ten un ku na akusa bos ku sedu Moisés, kil ku bo pui bo speransa nel.

⁴⁶ Si na bardadi bo fiaba na palabra di Moisés, bo ta fiaba tambi na mi, pabia i aserka di mi ku el i skirbi.

⁴⁷ Si bo ka fia na kil ku el i skirbi, kuma ku bo na fia na ña palabra?”