Bon Noba di Jesus Kristu ku Jon 4 - BIBLIA - traduson antigu in Krioulo

Minjer di Samaria

¹ Fariseus obi kuma Jesus na fasi jinti disipulus, i na batisaba mas di ki Jon.

² (Ma i ka Jesus ku na batisaba jinti; i si disipulus.)

³ Oca ku Jesus obi ke ku na faladu, i sai na Judeia, i riba pa Galileia.

⁴ I tenba ku pasa na Samaria.

⁵ I bai pa un prasa di Samaria ku ta comadu Sikar, pertu di terenu ku Jakó daba si fiju José.

⁶ I staba la un fonti ku seduba di Jakó. Jesus kansaba yanda, i sinta pertu di fonti, oca me-dia pertu.

⁷ I bin bin na fonti un minjer di Samaria pa kata yagu. Jesus falal: “Patin yagu pa N bibi.”

⁸ Si disipulus baiba kumpra kumida na prasa.

⁹ Minjer di Samaria fala Jesus: “Abo i judeu, bu na pidin, ami samaritanu, yagu di bibi!” (Pabia judeus ka ta filaba ku samaritanus.)

¹⁰ Jesus falal: “Si bu sibiba ke ku Deus tene pa da, o bu sibi tambi kin ku na pidiu yagu, bu ta pidilba, el i ta dau yagu ku ta da vida.”

¹¹ Minjer ruspundil: “Siñor, bu ka tene kusa pa kata yagu ku el, e fonti i fundu; nunde ku bu na tira yagu ku ta da vida?

¹² Nta bu mas garandi di ki no pape Jakó ku fikanu ku e fonti? El propi ku si fijus ku si limarias e bibi e yagu.”

¹³ Jesus falal: “Kin ku bibi e yagu li i na torna tene sedi mas,

¹⁴ ma kin ku bibi yagu ku ami N na dal i ka ta torna tene sedi mas, pabia yagu ku N na dal i ta fasi nel fonti di yagu bibu ku ta darma pa vida ku ka ta kaba.”

¹⁵ Minjer falal: “Siñor, dan ki yagu, pa N ka torna tene sedi, nin pa N ka torna bin kata yagu li.”

¹⁶ Jesus falal: “Bai coma bu omi, bu bin li.”

¹⁷ Minjer ruspundil: “N ka tene omi.” Jesus falal: “Bu papia diritu, manera ku bu fala bu ka tene omi,

¹⁸ pabia bu teneba ja sinku omi; kil ku bu tene gosi i ka bu omi; kil ku bu fala i bardadi.”

¹⁹ Minjer falal: “Siñor, N oja kuma abo i anunsiadur.

²⁰ No papes ta adoraba Deus ne monti; abos judeus bo fala kuma son na Jerusalen ku jinti dibi di adora Deus nel.”

²¹ Jesus falal: “Minjer, bu pudi fia kuma, ora na ciga ki ka na sedu ne monti, nin na Jerusalen, ku bo na adora ña Pape.

²² Abos bo ta adora kil ku bo ka kunsi; anos no ta adora kil ku no kunsi, pabia salbason bin di judeus.

²³ Ora na bin, i ciga ja, ku adoraduris di bardadi na adora ña Pape ku Spiritu ku bardadi, pabia ña Pape ta buska kil ku ta adoral asin.

²⁴ Deus i Spiritu; i pirsis pa kil ku na adoral pa i adoral ku Spiritu ku bardadi.”

²⁵ Minjer falal: “Ami N sibi kuma Mesias” (ku ta comadu Kristu) “i na bin; ora ki bin i na kontanu tudu.”

²⁶ Jesus ruspundil: “Ami ki Kristu, ami ku na papia ku bo.”

²⁷ Na ki ora disipulus di Jesus ciga, e fika dimiradu suma ku Jesus na papiaba ku un minjer, ma ningin ka puntal: “Ke ku bu misti?” o: “Pabia di ke ku bu na papia ku el?”

²⁸ Minjer disa si puti, i bai pa prasa, i fala jinti:

²⁹ “Bo bin jubi un omi ku kontan tudu kusas ku N fasi na ña vida. Nta es i ka Mesias?”

³⁰ Ki jinti sai na prasa, e bai pa Jesus.

Tempu di kebra

³¹ Na ki ora ku minjer bai, disipulus di Jesus ngodal, e falal: “Rabi, kume.”

³² Jesus fala elis: “N tene kumida pa kume ku bo ka kunsi.”

³³ Disipulus kumsa na punta ŋutru: “Algin tisil kusa di kume?”

³⁴ Jesus fala elis: “Ña kumida i pa N fasi vontadi di kil ku mandan, pa N kompleta si tarbaju.

³⁵ Nta bo ka ta fala kuma i ten kuatru mis pa tempu di kebra ciga? Ali N na fala bos: Bo yalsa uju, bo jubi labur ku sta ja maduru pa kebra.

³⁶ Kin ku kebra ta risibi pagamentu; i ta junta frutu pa vida ku ka ta kaba, pa kil ku ta sumia ku kil ku ta kebra, tudu ta fika kontenti.

³⁷ Ditadu i bardadi ku fala kuma un ta sumia, utru ta kebra.

³⁸ Ami N manda bos kebra lugar ku bo ka tarbaja. Utrus tarbaja, abos bo bin purbita di se tarbaju.”

³⁹ Manga di samaritanu di ki prasa seta Jesus, pa palabra ku minjer testifika kuma, i falal tudu kusas ki fasi na si vida.

⁴⁰ E bai pa Jesus, e pidil pa i fika ku elis. I fika ku elis dus dia.

⁴¹ Manga di jinti setal pabia di si palabra.

⁴² E fala minjer: “Gosi i ka pabia di bu palabra ku pui no fia, pabia anos propi no obil; no sibi kuma el, na bardadi, i Salbadur di mundu.”

Jesus kura fiju di un funsionariu

⁴³ Dus dia dipus, Jesus sai di la, i bai pa Galileia.

⁴⁴ El propi i fala kuma un anunsiadur ka ta rispitadu na si propi tera.

⁴⁵ Oca i ciga na Galileia, jinti di ki tera risibil, pabia elis tambi e baiba festival, e oja tudu kusas ki fasi na Jerusalen na ki dia.

⁴⁶ Jesus bai utru bias pa tabanka di Kaná, na Galileia, ki kau nunde ki bidanta yagu biñu. I tenba la un funsionariu ku si fiju staba duenti na Kafarnaun.

⁴⁷ I obi kuma Jesus na binba di Judeia pa Galileia. I bai pa el, i rogal pa i bai kural si fiju ku sta kuas pa muri.

⁴⁸ Jesus falal: “Si bo ka oja sinal ku milagri bo ka ta fia.”

⁴⁹ Funsionariu pidil: “Siñor, no bai antis di ña fiju muri.”

⁵⁰ Jesus falal: “Bai, bu fiju na bibu.” Omi fia na palabra di Jesus, i riba.

⁵¹ Oca ki na bai, si kriadus bin kontra ku el na kamiñu, e falal kuma si fiju sta ja bon.

⁵² I punta elis kal ora ki fika minjor. E ruspundil: “Aonti na uma ora di tardi febri sai nel.”

⁵³ Pape di mininu lembra kuma i sedu na ki ora ku Jesus falal kuma si fiju na bibu. I fia, ku tudu jinti di si kasa.

⁵⁴ Jesus fasi e sugundu milagri oca ki na bai di Judeia pa Galileia.