Bon Noba di Jesus Kristu ku Jon 19 - BIBLIA - traduson antigu in Krioulo

¹ Pilatus toma Jesus, i manda sutal.

² Soldadus kumpu un koroa di fidida, e pui Jesus el na kabesa, e bistil ropa suma di rei.

³ E na falaba: “Viva, rei di judeus!” E na dal bofotada.

⁴ Pilatus torna sai pa fora, i fala elis: “Ali N tisi bos el fora, pa bo sibi kuma N ka oja nin un kulpa nel.”

⁵ Jesus sai pa fora ku koroa di fidida na kabesa, ku bistimentu di rei. Pilatus fala elis: “Ali ki omi.”

⁶ Oca ŝefis di saserdoti ku guardas oja Jesus, e grita: “Krusifikal! Krusifikal!” Pilatus fala elis: “Bo tomal abos, bo krusifikal, pabia N ka oja kulpa nel.”

⁷ Ŝefis di judeu ruspundil: “Konformi lei ku no tene, i dibi di muri, pabia i fala kuma el i Fiju di Deus!”

⁸ Oca Pilatus obi ki palabra, i fika ku mas medu inda.

⁹ I yentra utru bias na palasiu, i punta Jesus: “Abo i di nunde?” Jesus ka ruspundil.

¹⁰ Pilatus puntal: “Bu ka na ruspundin? Bu ka sibi kuma N ten puder pa krusifikau, ku puder pa largau?”

¹¹ Jesus falal: “Ñu ka na tenba nin un puder kontra mi si Deus ka da Ñu el, ma kil ku ntregan na mon di Ñu ten pekadu mas garandi.”

¹² Disna di ki ora Pilatus na buskaba manera di largal, ma judeus na gritaba, e fala: “Si Ñu largal, Añu i ka amigu di rei. Tudu algin ku ta fala kuma el i rei, i kontra no rei garandi.”

¹³ Oca Pilatus obi ki palabra, i leba Jesus pa fora, i sinta na tribunal na un kau ku ta comadu Kalsada di Pedra; na lingua ebraiku i comadu Gabata.

¹⁴ I seduba vespera di Paskua, kuas me-dia. Pilatus fala judeus: “Ali bo rei.”

¹⁵ Ma elis e grita: “Tiral! Tiral! Krusifikal!” Pilatus punta elis: “N na krusifika bo rei?” Ŝefis di saserdoti ruspundil: “No ka tene utru rei fora di rei garandi.”

¹⁶ Pilatus ntrega elis Jesus pa i pudi krusifikadu. E tomal e leba.

Krusifikason

¹⁷ Jesus karga si krus na kosta, i sai i bai pa un lugar ku ta comadu Kaku di Kabesa, ku na ebraiku signifika Gólgota.

¹⁸ E krusifikal na ki kau juntu ku mas dus omi, un na kada ladu ku Jesus na metadi.

¹⁹ Pilatus skirbi na un plaka, i pul riba di krus. Na ki plaka i staba skritu: “JESUS NAZARENU, REI DI JUDEUS”.

²⁰ I staba skritu na ebraiku, gregu ku latin. Manga di judeu lei ki palabra, pabia kau ku Jesus krusifikaduba nel staba pertu di prasa.

²¹ Ŝefis di saserdoti di judeus fala Pilatus: “Ka Ñu skirbi: ‘Rei di judeus’, ma kuma el i fala i rei di judeus.”

²² Pilatus ruspundi elis: “Kil ku N skirbi, N skirbi.”

²³ Oca soldadus kaba krusifika Jesus, e toma si ropa, e fasil kuatru parti, un parti pa kada soldadu, ku si kamisoti tambi. Kamisoti tisiduba di riba te bas; i ka teneba kustura.

²⁴ Ki soldadus fala ŋutru: “Ka no rumpil, ma no juga sorti pa jubi kin ku na fika ku el.” Es i pa i sedu suma ku Skritura fala: “E rapati ña ropa entri elis; e juga sorti riba di ña kamisoti.” Asin ku soldadus fasi.

²⁵ Mame di Jesus staba pertu di krus, ku si irma Maria, minjer di Kléofas, ku Maria Madalena.

²⁶ Jesus oja si mame ku ki disipulu ki amaba ku staba la sikidu. I fala si mame: “Mama, ali bu fiju.”

²⁷ Dipus i fala ki disipulu: “Ali bu mame.” Disna di ki ora ki disipulu risibi Maria na si kasa.

²⁸ Jesus oja kuma tudu kusas sta ja kompletadu. Pa Skritura pudi kumpri, i fala: “N tene sedi.”

²⁹ Un jaru staba la ku inci vinagri. E moja sponja na vinagri, e maral na un po kumpridu, e cigantal na boka di Jesus.

³⁰ Kontra i toma ki vinagri, i fala: “I sta kompletu.” I mpina kabesa, i muri.

³¹ I seduba dia ku na mansi pa dia di diskansu, dia garandi di festival di Paskua. Pa ka kurpus fika na krus na ki dia, judeus pidi Pilatus pa i manda kebra se pernas, pa e tiradu na krus.

³² Soldadus bai, e kebra pernas di ki dus omi ku krusifikadu ku el.

³³ Oca e ciga nunde Jesus, e oja kuma i muri ja; e ka kebral perna,

³⁴ ma un di ki soldadus fural na ladu ku kañaku; i sai logu sangi ku yagu.

³⁵ Kil ku ojal i konta kil ku kontisi; si tustumuñu i bardadi; i sibi kuma i bardadi ki na konta, pa bo pudi fia tambi.

³⁶ E kusa kontisi pa pudi kumpri Skritura ku fala: “Nin un di si os ka na kebradu.”

³⁷ Skritura fala na utru kau: “E na oja pa kil ke fidi ku kañaku.”

Jesus nteradu

³⁸ Dipus de kusa, José di Arimateia, ku seduba disipulu di Jesus, ma sukundidu pabia i mediba judeus, i pidi Pilatus pa otrizal pa i tira kurpu di Jesus. Pilatus seta. José bai, i tira kurpu.

³⁹ Nikodemus (kil ku baiba pa Jesus di noti) i bai tambi, i leba serka di korenta i sinku kilu di un mistura di mira ku aloés.

⁴⁰ E toma kurpu di Jesus, e mbuljal na lensolis, ku purfumus, suma ku judeus kustuma ta fasi na purparason pa nteru.

⁴¹ I tenba un jardin na ki ladu nunde ku Jesus krusifikadu nel; na ki jardin i tenba un koba nobu; ningin ka nteradu nel inda.

⁴² E pui Jesus na ki kau, pabia i seduba vespera di dia di diskansu di judeus, tambi pabia ki koba fikaba pertu.