Bon Noba di Jesus Kristu ku Jon 17 - BIBLIA - traduson antigu in Krioulo

Orason di Jesus pa si disipulus

¹ Jesus papia e kusas; i yalsa uju pa seu, i fala: “Pape, ora ciga. Glorifika bu Fiju pa bu Fiju pudi glorifikau tambi,

² suma ku bu dal puder riba di tudu jinti, pa i pudi da vida ku ka ta kaba pa tudu kilis ku bu ntregal.

³ Vida ku ka ta kaba i es: Pa tudu jinti kunsiu, abo son, uniku Deus di bardadi, ku Jesus Kristu, kil ku bu manda.

⁴ N mostra bu gloria na mundu; N kompleta tarbaju ku bu dan pa N fasi.

⁵ Pape, glorifikan juntu di bo propi ku ki gloria ku N teneba ku bo antis di mundu sedu.

⁶ “Kilis ku bu tira na mundu, bu dan, N fasi elis pa e kunsiu. E seduba di bo, bu dan elis, e obdisi bu palabra.

⁷ Gosi e sibi kuma tudu kusas ku bu dan e bin di bo,

⁸ pabia N da elis palabra ku bu dan; elis e risibil; e sibi diritu kuma N bin di bo, e fia kuma i abo ku mandan.

⁹ N na roga pa elis; N ka na roga pa kilis ki di mundu, ma pa kilis ku bu dan, pabia elis i di bo.

¹⁰ Tudu ki di mi i di bo; tudu ki di bo i di mi; i nelis ku N glorifikadu.

¹¹ N ka sta ja na mundu, ma elis e sta na mundu. Ami N na bai pa bo. Pape santu, guarda na puder di bu nomi kilis ku bu dan, pa e sedu un son suma nos.

¹² Oca ku N sta na mundu ku elis, N guarda elis na puder di bu nomi. N guarda kilis ku bu dan; nin un delis ka pirdi, son kil ku tenba ku pirdi, pa i pudi sedu suma ku Skritura fala.

¹³ Gosi N na bai pa bo. N na konta e kusas na mundu, pa e ten ña alegria kompletu nelis propi.

¹⁴ N da elis bu palabra; jinti di mundu nfastia elis pabia elis i ka di mundu, suma ku ami i ka di mundu.

¹⁵ N ka na pidiu pa bu tira elis na mundu, ma pa bu guarda elis di puder di mal.

¹⁶ Elis i ka di mundu, suma ku ami i ka di mundu.

¹⁷ Santifika elis na bardadi; bu palabra i bardadi.

¹⁸ Suma ku bu mandan pa mundu, tambi N manda elis pa mundu.

¹⁹ Pa amor delis N na santifika ña kabesa, pa elis tambi e pudi santifikadu na bardadi.

²⁰ “N ka na roga son pa elis, ma tambi pa kilis ku na bin setan pabia di se palabra,

²¹ pa elis tudu sedu un son, suma abo, ña Pape, bu sta na mi, ami na bo; pa elis tambi e sedu un son na nos, pa jinti di mundu fia kuma i abo ku mandan.

²² Ami N da elis ki gloria ku bu dan, pa e sedu un son, suma ku anos i un son,

²³ ami nelis, abo na mi, pa elis e ten unidadi diritu, pa mundu sibi kuma abo ku mandan, tambi bu ama elis suma ku bu aman.

²⁴ Pape, kilis ku bu dan, N misti pa e sta juntu ku mi na kau ku N sta nel, pa e oja ña gloria ku bu dan, pabia bu aman antis di mundu kumpudu.

²⁵ Pape justu, jinti di mundu ka kunsiu, ma ami N kunsiu; esis e sibi kuma i abo ku mandan.

²⁶ Ami N pui elis kunsiu; N na fasi elis kunsiu mas, pa bu amor ku bu aman ku el sta nelis, ami tambi pa N sta nelis.”