Bon Noba di Jesus Kristu ku Jon 15 - BIBLIA - traduson antigu in Krioulo

Union di Jesus ku krenti

¹ “Ami i pe di uva di bardadi; ña Pape i labradur.

² I ta korta tudu ramu ku sta na mi ku ka ta padi, ma i ta limpa tudu ki ramus ku ta padi pa e pudi padi mas.

³ Abos bo sta ja limpu pabia di palabra ku N fala bos.

⁴ Bo sta na mi, ami N ta sta na bos. Suma ku ramu, el propi, ka ta pudi padi si i ka sta na si pe, asin tambi abos, si bo ka sta na mi.

⁵ “Ami i suma pe di uva, abos i ramus. Kin ku sta na mi, ami N sta nel, i ta padi frutu ciu, pabia sin mi bo ka pudi fasi nada.

⁶ Kin ku ka sta na mi i na botadu fora, suma ramu; i ta seku. E koldadi i ta kujidu, i botadu na fugu pa i kema.

⁷ Si bo sta na mi, ña palabra sta na bos, bo ta pidi tudu kil ku bo misti; i ta fasidu pa bos.

⁸ Ña Pape ta glorifikadu si bo padi frutu ciu. Asin bo ta sedu ña disipulus.

⁹ Suma ku ña Pape aman, ami tambi N ama bos; bo kontinua na ña amor.

¹⁰ Si bo obdisi ña mandamentus, bo ta kontinua na ña amor, di mesmu manera ku N obdisi mandamentus di ña Pape, N kontinua na si amor.

¹¹ “N konta bos e kusa pa ña alegria sta sempri na bos, pa bo alegria sta kompletu.

¹² Es i ña mandamentu: pa bo ama ŋutru suma ku N ama bos.

¹³ Ningin ka ten amor mas garandi di ki es, di da si vida pa si amigus.

¹⁴ Bo ta sedu ña amigus si bo fasi ke ku N manda bos.

¹⁵ N ka na coma bos mas di servus, pabia servu ka ta sibi ke ku si Siñor ta fasi; ma N na coma bos amigus, pabia N konta bos tudu ku N obi di ña Pape.

¹⁶ Abos bo ka kujin, ma i ami ku kuji bos, N coma bos pa bo bai, bo padi frutu, pa bo frutu fika ntidu, pa Pape pudi da bos tudu ku bo pidil na ña nomi.

¹⁷ Kusa ku N na manda bos i pa bo ama ŋutru.

¹⁸ “Si jinti di mundu na nfastia bos, ka bo diskisi kuma, purmeru, antis di bos, e nfastian tambi.

¹⁹ Si bo seduba di mundu, mundu ta ama kil ki di sil, ma suma abos i ka di mundu, ma ami N kuji bos na mundu, e ku manda jinti di mundu ta nfastia bos.

²⁰ Bo lembra de palabra ku N fala bos kuma, servu i ka mas garandi di ki si patron. Si e pirsigin, e na pirsigi bos tambi; si e obdisi ña palabra, tambi e na obdisi di bos.

²¹ E na fasi bos tudu e kusas pabia di mi, suma e ka kunsi kil ku mandan.

²² Si ami N ka binba, nin N ka fala ku elis, e ka ta tenba kulpa na se pekadu, ma gosi e ka ten diskulpa di se pekadu.

²³ Kin ku ta nfastian i ta nfastia ña Pape tambi.

²⁴ Si N ka fasiba e kusas na se metadi ku nunka ningin ka fasi, e ta tenba diskulpa na se pekadu, ma gosi e oja kil ku N fasi, e nfastian, ami ku ña Pape.

²⁵ I pa i pudi sedu suma ki sta skritu na se lei: ‘E nfastian sin roson.’

²⁶ Ora ku Judadur bin, ku N na bin manda bos di parti di ña Pape, ki Spiritu di bardadi ku ta bin di ña Pape, el i na konta aserka di mi.

²⁷ Abos tambi bo na konta, pabia bo sta sempri ku mi disna di kumsada.