Bon Noba di Jesus Kristu ku Jon 14 - BIBLIA - traduson antigu in Krioulo

Jesus i kamiñu pa Deus

¹ I kontinua fala elis: “Bo diskansa bo korson tarpajadu. Suma bo fia na Deus, bo fia tambi na mi.

² Kasa di ña Pape tene manga di moradia; si i ka asin ba, N na kontaba bos. N na bai purpara bos lugar.

³ Si N bai purpara bos lugar, N na bin utru bias, N na leba bos pa mi propi, pa nunde ku N sta nel, bo ta sta la tambi.

⁴ Abos propi bo sibi nunde ku N na bai; bo kunsi kamiñu pa ki kau.”

⁵ Tome falal: “Anos no ka sibi nunde ku bu na bai; kuma ku no pudi kunsi kamiñu?”

⁶ Jesus falal: “Ami i kamiñu, ami i bardadi, ami i vida. Si algin misti bin pa ña Pape, i ten ku pasa purmeru na mi.

⁷ Si bo kunsinba, bo na kunsiba ña Pape; disna di gosi bo kunsil; bo ojal ja.”

⁸ Filip falal: “Siñor, si bu mostranu bu Pape, i ta justa.”

⁹ Jesus falal: “Filip, N sta manga di tempu ku bos; bo ka kunsin inda? Kin ku ojan, i oja ña Pape. Kuma ku bu na falan pa N mostra bos ña Pape?

¹⁰ Bu ka fia kuma ami N sta na ña Pape, ña Pape sta na mi? Palabras ku N fala bos, N ka ta falal di mi propi, ma ña Pape ku sta na mi, i el ku ta fasi e kusas ku ami N na fasi.

¹¹ Bo fia na mi kuma N sta na ña Pape, ña Pape sta na mi. Bo fia na mi, nin si i son pabia di milagris ku N ta fasi.

¹² N na fala bos bardadi, kin ku fia na mi i ta fasi tambi e kusas ku N ta fasi; i ta fasi inda mas garandi di ki esis, pabia ami N na bai pa ña Pape.

¹³ Tudu kusa ku bo pidi na ña nomi, N ta fasil, pa ña Pape pudi glorifikadu na si Fiju.

¹⁴ Si bo pidi kualker kusa na ña nomi, N ta fasil.

¹⁵ “Si bo aman, bo ta obdisi ña mandamentus.

¹⁶ N na pidi ña Pape; el i ta da bos utru Judadur ku na fika ku bos pa sempri,

¹⁷ ku sedu Spiritu di bardadi ku jinti ku ka kunsi Deus ka pudi risibi, pabia e ka ta nota pa el, nin e ka kunsil; ma abos bo kunsil, pabia i mora ku bos; i na sta na bos.

¹⁸ “N ka na disa bos dingidu; N na riba pa bos.

¹⁹ Mas un bokadu, jinti di mundu ka na ojan, ma abos bo na ojan. Suma ami N sta bibu, abos tambi bo na bibu.

²⁰ Na ki dia bo na sibi kuma ami N sta na ña Pape, abos na mi, ami na bos.

²¹ Kin ku tene ña mandamentus, i obdisi elis, i el ku aman. Kin ku aman, ña Pape tambi ta amal; ami N ta amal, N ta mostral ami i kin.”

²² Judas (ki ka Iskariotis) puntal: “Siñor, kuma ku bu na pui pa no ojau, bu ka pui pa jinti di mundu ojau?”

²³ Jesus ruspundil: “Si algin aman, i ta obdisi ña palabra; ña Pape ta amal; no ta bin pa el, no mora ku el.

²⁴ Kin ku ka aman i ka ta obdisi ña palabra. Palabra ku bo obi i ka di mi, ma i di ña Pape ku mandan.

²⁵ “N konta bos e kusas nkuantu N sta ku bos.

²⁶ Ki Judadur, ku sedu Spiritu Santu ku ña Pape na manda na ña nomi, i na bin nsina bos tudu kusas; i na fasi bos lembra tudu kusas ku N fala bos.

²⁷ N na disa bos ku pas; N na da bos ña pas. N ka na da bos el suma ku mundu ta da. Bo diskansa bo korson tarpajadu; ka bo medi.

²⁸ Bo obi ke ku N fala bos, kuma N na bai, N na bin bin pa bos. Si bo aman di bardadi, bo ta kontenti suma ku N fala bos kuma N na bai pa ña Pape, pabia el i mas mi puder.

²⁹ N na fala bos e kusa gosi antis di i kontisi, pa ora ki kontisi, bo ta fia.

³⁰ N ka na papia ciu ku bos, pabia ŝef de mundu pertu ja; i ka tene nada riba di mi.

³¹ I pirsis pa jinti di mundu sibi kuma N ama ña Pape, tambi N ta fasi kil ki mandan. Bo lanta, no sai di li.