Bon Noba di Jesus Kristu ku Jon 13 - BIBLIA - traduson antigu in Krioulo

Jesus laba pe di disipulus

¹ Antis di festival di Paskua, Jesus sibiba ja kuma ora ciga pa i disa e mundu pa i bai pa si Pape. Suma ki ama kilis ki di sil ku staba ne mundu, i ama elis te na fin.

² Oca e kaba sia, diabu puiba ja na korson di Judas Iskariotis, fiju di Simon, pa i bindi Jesus.

³ Jesus sibiba kuma si Pape dal tudu puder; i sibi tambi kuma i sai di Deus, i na riba pa Deus.

⁴ I lanta di sia, i tira si kamisa, i toma tuaja, i maral na rabada.

⁵ Dipus i pui yagu na basia, i kumsa laba si disipulus pe, i limpa elis pe ku tuaja ki maraba na rabada.

⁶ Oca ki ciga na Simon Pedru, kila puntal: “Siñor, bu na laban pe?”

⁷ Jesus ruspundil: “Kusa ku N na fasi, bu ka na ntindil gosi, ma dipus bu na bin ntindil.”

⁸ Pedru falal kuma nunka i ka na labal pe. Jesus ruspundil: “Si N ka labau, bu ka ta ten parti ku mi.”

⁹ Simon Pedru falal: “Bu ka na laban son pe, ma bu na laban mon ku kabesa tambi.”

¹⁰ Jesus falal: “Kin ku labadu ja, i pirsisa di laba son pe, pabia restanti sta tudu labadu. Abos bo sta limpu, ma i ka abos tudu.”

¹¹ Jesus sibiba kin ku na bin falsial; e ku manda i fala: “Nin i ka abos tudu ku sta limpu.”

¹² Dipus di Jesus laba elis pe, i bisti si kamisa, i sinta utru bias na mesa, i punta elis: “Bo ntindi e kusa ku N fasi bos?

¹³ Bo ta coman Mestre ku Siñor. Bo fala bardadi, pabia ami i el.

¹⁴ Si ami gora N sedu Siñor ku Mestre, N laba bos pe, abos tambi bo dibi di laba ŋutru pe.

¹⁵ N da bos isemplu, pa manera ku N fasi bos, bo fasi asin tambi.

¹⁶ N na fala bos bardadi kuma, servu i ka mas garandi di ki si patron, nin kil ku mandadu i ka mas garandi di ki kil ku mandal.

¹⁷ Si bo sibi e kusas, bo ta sortiadu si bo fasil.

¹⁸ “N ka na fala di bos tudu. Ami N kunsi kilis ku N kuji, ma i ten ku sedu suma ku Skritura fala: ‘Kil ku kume pon ku mi i lantanda si kalkañada kontra mi.’

¹⁹ Disna di gosi N na fala bos e kusa antis di i kontisi, pa ora ki sedu, bo ta fia kuma ami N sedu kil ku N sedu.

²⁰ N na konta bos bardadi kuma, kin ku risibi kil ku N manda, i ami ki risibi. Kin ku risibin ta risibi kil ku mandan.”

Jesus konta kuma i Judas Iskariotis ku na bin falsial

²¹ Oca Jesus kaba fala e kusas, i fika tristi na si spiritu, i fala klaru: “N na konta bos bardadi kuma un di bos na falsian.”

²² Si disipulus kumsa na jubi ŋutru, e ka sibiba di kin ki na fala.

²³ Un di disipulus, kil ku Jesus amaba, i mpina riba di Jesus.

²⁴ Simon Pedru fasi ki disipulu sinal pa i punta Jesus kal delis ki na fala del.

²⁵ Ki disipulu ngosta riba di pitu di Jesus, i puntal: “Siñor, i kin?”

²⁶ Jesus ruspundi: “I kil ku N na da un padas di pon mojadu.” I moja padas di pon, i da Judas Iskariotis, fiju di Simon.

²⁷ Dipus di Judas toma ki padas, Satanas yentra nel. Logu Jesus falal: “Kusa ku bu na fasi, fasil kinti-kinti.”

²⁸ Nin un di ki jinti ku sintaba na mesa ka ntindi pabia di ke ku Jesus fala asin,

²⁹ ma, suma ku Judas ta rakada diñeru, utrus pensaba kuma Jesus falal pa i kumpra kusa ki pirsis pa festival, o pa i bai da pobris kualker kusa.

³⁰ Oca Judas toma padas di pon, i sai logu. I seduba ja di noti.

Nobu mandamentu

³¹ Oca Judas sai, Jesus fala: “Gosi gloria di Fiju di omi i na ojadu. Deus na glorifikadu nel.

³² Si Deus glorifikadu nel, tambi Deus na pui pa gloria di Fiju di omi ojadu nel propi; i ten ku glorifikal gosi.

³³ Ña fijus, inda un bokadiñu N na sta ku bos. Abos bo na buskan. Suma ku N falaba judeus, tambi N na konta bos el gosi, kuma, kau ku N na bai, abos bo ka pudi bai la.

³⁴ N na da bos mandamentu nobu, pa bo ama ŋutru; suma ku N ama bos, asin tambi ku bo ta ama ŋutru.

³⁵ Si bo ama ŋutru, tudu jinti ta rapara kuma abos i ña disipulus.”

³⁶ Simon Pedru puntal: “Siñor, nunde ku bu na bai?” Jesus ruspundil: “Kau ku N na bai bu ka pudi sigin gosi, ma dipus bu na sigin.”

³⁷ Pedru puntal: “Pabia di ke ku N ka pudi sigiu gosi? N sta pruntu pa da ña vida pa bo.”

³⁸ Jesus puntal: “Abo bu ta da bu vida pa mi? N na falau bardadi kuma, antis di galu kanta, bu na negan tris bias.”