Bon Noba di Jesus Kristu ku Jon 12 - BIBLIA - traduson antigu in Krioulo

Maria unta Jesus ku oliu purfumadu

¹ Seis dia antis di Paskua, Jesus bai pa Betânia, nunde ku Lazaru staba nel, ki Lazaru ku muriba, ku Jesus lantanda di mortu.

² E fasil sia la. Marta na sirbiba; Lazaru i un di kilis ku staba juntu ku Jesus na mesa.

³ Maria toma meiu kilu di un pomada karu, di nardu puru, ku ta cera sabi, i unta Jesus na pe, i limpal pe ku si kabelu. Tudu kasa fika i na cera sabi.

⁴ Un di si disipulus comadu Judas Iskariotis, kil ku bin falsia Jesus, punta:

⁵ “Pabia di ke ku e purfumu ka bindidu pa trizentus mueda di prata, pa pobris dadu el?”

⁶ Judas fala e kusa, i ka pabia i gosta di pobris, ma pabia i el ku ta tene bolsa di diñeru; i seduba ladron, i ta furta kusa ku ta puduba nel.

⁷ Jesus fala: “Bo disal. I guarda e purfumu pa i sirbi pa dia di ña nteru.

⁸ Sempri bo na tene pobris juntu ku bos, ma ami, N ka na sta sempri ku bos.”

⁹ Manga di judeu bin sibi kuma Jesus sta la; e bai, i ka son pabia di Jesus, ma tambi pa e oja Lazaru ku Jesus lantanda di mortu.

¹⁰ Asin ŝefis di saserdoti rezolvi tambi mata Lazaru,

¹¹ suma ku manga di judeu na disa elis, e na bai pa Jesus, e fia nel, pabia di Lazaru.

Jesus yentra na Jerusalen

¹² Sol mansi, manga di jinti ku binba festival obi kuma Jesus na bin pa Jerusalen.

¹³ E toma ramus di palmera, e sai, e bai kontra ku Jesus, e na grita: “Osana! Rei di Israel ku bin na nomi di Siñor i mersi ngabadu!”

¹⁴ Jesus oca un buru pikininu, i sinta riba del, suma ki sta skritu:

¹⁵ “Prasa di Sion, ka bu medi. Ali bu Rei na bin sintadu riba di fijusiñu di buru.”

¹⁶ Si disipulus ka ntindi e kusas na kumsada, ma oca Jesus glorifikadu, e kumsa lembra kuma e kusa ke fasil staba skritu aserka del.

¹⁷ Ki jinti ku mati oca Jesus tira Lazaru na koba konfirma kuma Jesus lantandal na metadi di mortus.

¹⁸ E ku manda ki multidon sai pa bai kontra ku Jesus, pabia e obiba kuma i fasi ki milagri.

¹⁹ Fariseus fala entri elis: “Bo oja kuma bo ka na purbita nada? Tudu jinti na bai si tras!”

Gregus misti oja Jesus

²⁰ Na metadi di jinti ku bai pa adora Deus na dia di festival i staba utru gregus.

²¹ Elis e bai oja ku Filip, ku seduba di prasa di Betsaida di Galileia. E rogal, e falal: “Siñor, no misti oja Jesus.”

²² Filip bai konta André; elis dus e bai konta Jesus.

²³ Jesus ruspundi elis: “Ora ciga pa Fiju di omi sedu glorifikadu.

²⁴ N na konta bos bardadi kuma, si garan di arus ka kai na con, i ka muri, i ta fika el son, ma si i muri i ta padi ciu.

²⁵ Kin ku ama si vida i na pirdil; kin ku ne mundu nfastia si vida, i na tenel pa vida ku ka ta kaba.

²⁶ Kin ku na sirbin pa i sigin. Nunde ku N sta nel, ña servu na sta la tambi. Si algin sirbin, ña Pape na onral.

Jesus fala aserka di si mortu

²⁷ “Gosi ña alma sta ku kasabi dimas. Ke ku N na fala? O nos N na fala: ‘Pape, salban de ora li’? Ma i pa e ora ku N bin mundu.

²⁸ Pape, glorifika bu nomi.” Logu i bin un vos di seu ku falal: “N glorifikal ja. N na glorifikal mas.”

²⁹ Multidon di jinti ku staba la ku obi ki vos e fala: “I turbada.” Utrus fala: “I un anju ku papia ku el.”

³⁰ Jesus ruspundi: “E vos ka bin pabia di mi, ma pabia di bos.

³¹ Tempu ciga pa julgamentu de mundu. Gosi ŝef de mundu na serkadu fora.

³² Ora ku N lantandadu di tera, N na junda tudu jinti pa mi.”

³³ I na falaba e kusa pa mostra di kal koldadi mortu ki na muri.

³⁴ Multidon ruspundil: “No lei kontanu kuma Kristu ta fika pa sempri. Kuma ku bu na fala kuma i pirsis pa Fiju di omi lantandadu? Kin ki ki Fiju di omi?”

³⁵ Jesus fala elis: “Lus inda sta ku bos pa puku tempu; bo yanda nkuantu bo tene lus, pa sukuru ka paña bos, pabia kin ku ta yanda na sukuru ka ta sibi pa nunde ki na bai nel.

³⁶ Nkuantu bo tene lus bo fia na lus, pa bo pudi sedu jinti di lus.” Oca Jesus fala e palabra, i bai sukundi delis.

Falta di fiansa na Jesus

³⁷ Jesus fasi manga di milagri dianti di ki jinti, ma e ka fia nel,

³⁸ pa pudi kumpri palabra di anunsiadur Isaias ku punta: “Siñor, kin ku fia oca no konta bu palabra? Puder di Siñor i mostradu pa kin?”

³⁹ Asin e ka pudi fia, suma ku Isaias fala utru bias:

⁴⁰ “I sega elis uju; i tapa elis ntindimentu, pa e ka pudi oja ku uju, nin pa e ntindi na kabesa, nin pa e riba pa mi Deus, pa N kura elis.”

⁴¹ Isaias fala e kusas oca i oja gloria di Jesus, i fala aserka del.

⁴² Mesmu asin, manga di ŝef di judeus fia na Jesus, ma e ka seta mostra, ku medu di fariseus, pa ka e serkadu na kasa di juntamentu.

⁴³ E amaba mas gloria di omi di ki gloria di Deus.

Jesus i lus di mundu

⁴⁴ Jesus yalsa vos, i fala: “Kin ku fia na mi, i ka na mi ki fia, ma na kil ku mandan.

⁴⁵ Kin ku ojan, i oja kil ku mandan.

⁴⁶ Ami i lus ku bin na mundu, pa tudu kin ku setan ka ta fika na sukuru.

⁴⁷ Ma kin ku obi ña palabra, i ka obdisil, ami N ka na julgal, pabia N ka bin pa julga mundu, ma pa N salba mundu.

⁴⁸ Kin ku negan, i ka risibi ña palabra, i ten ja kin ku na julgal; palabra ku N konta, es ku na julgal na ultimu dia.

⁴⁹ Ami N ka papia di mi propi, ma ña Pape ku mandan, el i dan ordi aserka di kusas ku N dibi di konta ku kil ku N dibi di fala.

⁵⁰ N sibi kuma si ordi ta da vida ku ka ta kaba. Asin kil ku N na fala, N ta falal suma ku ña Pape kontan pa N fala.”