Bon Noba di Jesus Kristu ku Jon 11 - BIBLIA - traduson antigu in Krioulo

Mortu di Lazaru

¹ Un omi comadu Lazaru staba duenti. I seduba di Betânia, tabanka nunde ku si irmas Maria ku Marta moraba.

² Maria i ki minjer ku unta Siñor ku purfumu, i limpal pe ku si kabelu.

³ Ki dus irma di Lazaru manda fala Jesus: “Siñor, kil ku bu ama i duensi.”

⁴ Jesus obi e kusa, i fala: “E duensa i ka di mortu, ma i pa gloria di Deus, pa Fiju di Deus sedu glorifikadu nel.”

⁵ Jesus amaba Marta ku si irma ku Lazaru,

⁶ ma kontudu i obi kuma Lazaru staba duenti, i fika inda dus dia na ki kau ki staba nel.

⁷ Dipus, i fala si disipulus: “No bai mas pa Judeia.”

⁸ Si disipulus falal: “Mestre, nin i ka tarda ku ŝefis di judeu mistiba dau ku pedra; bu na torna riba mas pa la?”

⁹ Jesus ruspundi, i punta elis: “Nta un dia ka tene dozi ora? Kin ku yanda di dia ka ta da tapada, pabia i ta oja lus de mundu,

¹⁰ ma kin ku yanda di noti i ta da tapada, pabia lus ka ten.”

¹¹ Dipus i torna fala elis mas: “No amigu Lazaru na durmi, ma N na bai kordal di sonu.”

¹² Si disipulus falal: “Siñor, si i na durmi i na bin san.”

¹³ Ma Jesus na falaba di mortu di Lazaru. Disipulus kuda kuma i na fala di sonu di diskansu.

¹⁴ Jesus fala elis klaru: “Lazaru muri.

¹⁵ N kontenti pabia di bos manera ku N ka staba la, pa bo pudi fia; ma no bai nunde el.”

¹⁶ Tome, ku ta comadu Jemia, fala si kumpañeris: “No bai tambi, pa no muri juntu ku el.”

Jesus fala aserka di resureison

¹⁷ Oca Jesus ciga, i obi kuma Lazaru tenba ja kuatru dia na koba.

¹⁸ Betânia lunjusi di Jerusalen kuas tris kilometru.

¹⁹ Manga di ŝefis di judeu bai fala Marta ku Maria manteña pa konsola elis na mortu di se ermon.

²⁰ Oca ku Marta obi kuma Jesus ciga, i sai, i bai kontra ku el. Maria fika sintadu na kasa.

²¹ Marta fala Jesus: “Siñor, si bu staba li, ña ermon ka na muriba,

²² ma tambi N sibi kuma, tudu kusa ku bu pidi Deus, Deus ta dau.”

²³ Jesus falal: “Bu ermon na lanta di mortu.”

²⁴ Marta falal: “N sibi kuma i na bin lanta di mortu na resureison di ultimu dia.”

²⁵ Jesus falal: “Ami i resureison, ami i vida. Kin ku setan, inda ki muri, i ta sta bibu.

²⁶ Tudu kil ku na vivi, i setan, nunka i ka na muri. Bu fia nes?”

²⁷ Marta falal: “Sin, Siñor, N fia kuma abo i Mesias, Fiju di Deus, ku staba pa bin mundu.”

²⁸ Oca i kaba fala e palabra, i bai coma si irma Maria na sigridu, i falal: “Mestre sta li, i na comau.”

²⁹ Oca Maria obi ki palabra, i lanta dipresa, i bai pa kontra ku Jesus.

³⁰ Jesus ka cigaba inda tabanka, ma i staba na ki kau nunde ku Marta kontraba ku el.

³¹ Ki judeus ku staba ku Maria na kasa pa konsolal, oca e ojal i lanta kinti-kinti, i sai, e sigil, e fala: “I na bai cora na koba.”

³² Maria bin ciga nunde ku Jesus staba nel, i ojal, i kai si dianti, i falal: “Siñor, si bu staba li, ña ermon ka na muriba.”

³³ Oca Jesus ojal i na cora, judeus ku bin ku el na cora tambi, i fika tristi ku garandi pena,

³⁴ i punta: “Nunde ku bo nteral nel?” E falal: “Siñor, bin jubi.”

³⁵ Jesus cora.

³⁶ Ŝefis di judeu fala: “Bo jubi kuma ki amalba.”

³⁷ Utrus na se metadi na punta: “El ku yabri uju di ki segu, i ka pudiba tambi libra Lazaru di muri?”

³⁸ Utru bias Jesus torna sinti pena; i bai pa koba. I seduba un kaverna garandi ku tapadu boka ku pedra.

³⁹ Jesus fala: “Bo tira pedra.” Marta, irma di difuntu, falal: “Siñor, i na cera fedi, pabia i ten ja kuatru dia.”

⁴⁰ Jesus puntal: “N ka falau kuma, si bu fia, bu na oja gloria di Deus?”

⁴¹ E tira pedra. Jesus yalsa uju pa seu, i fala: “Pape, N falau obrigadu suma ku bu obin.

⁴² N sibi kuma bu ta obin sempri, ma N fala e palabras pabia de jinti ku sta lungu di mi, pa e fia kuma i abo ku mandan.”

⁴³ Oca i kaba papia, i yalsa vos i fala: “Lazaru, sai pa fora!”

⁴⁴ Difuntu sai. I teneba si pe ku mon maradu ku banda; si rostu staba kubridu ku lensu. Jesus fala elis: “Bo dismancal pa i pudi yanda.”

⁴⁵ Manga di ki judeus ku binba nunde Maria e kumsa fia na Jesus oca e oja ki kusa ki fasi.

Fariseus fasi un runion pa mata Jesus

⁴⁶ Utru di ki jinti e bai konta fariseus kusa ku Jesus fasi.

⁴⁷ Dipus, ŝefis di saserdoti ku fariseus fasi un runion, e punta: “Ke ku no na fasi? E omi na fasi manga di milagri.

⁴⁸ Si no disal asin, tudu jinti na fia nel. Romanus ta bin tiranu no templu ku no nason.”

⁴⁹ Kaifás, ku seduba ŝef di saserdotis na ki anu, fala elis: “Abos bo ka sibi nada.

⁵⁰ Bo ka oja kuma i bon pa un omi muri pa pobu, pa ka nason muri tudu?”

⁵¹ Kaifás ka fala ki palabra del propi, ma, suma i seduba ŝef di saserdotis na ki anu, Deus pui ki palabra na si boka kuma Jesus dibi di muri pa nason.

⁵² I ka son pa nason, ma pa junta, na un kurpu son, fijus di Deus ku staba pajigadu.

⁵³ Disna di ki dia e na buskaba manera pa matal.

⁵⁴ E ku manda Jesus ka na yandaba ja na metadi di judeus, pa ka e pudi ojal, ma i bai pa un kau ku staba juntu di lala, pa un prasa ku ta comadu Efrain; i staba la juntu ku si disipulus.

⁵⁵ Festival di judeus ku comadu Paskua staba ja pertu. Manga di jinti di ki reẑion bai pa Jerusalen antis di Paskua pa fasi sirmonia di purifikason.

⁵⁶ E na buskaba Jesus, e na punta ŋutru na kasa di Deus: “Ke ki parsi bos? I ka na bin festival?”

⁵⁷ Ŝefis di saserdoti ku fariseus daba ordi kuma, kin ku sibi nunde ku Jesus staba nel, pa i konta elis, pa e pudi prindil.