Bon Noba di Jesus Kristu ku Jon 10 - BIBLIA - traduson antigu in Krioulo

Jesus, bon Bakiadur

¹ Jesus fala: “N na konta bos bardadi, kin ku ka yentra na porta na koral di karnel, ma i kamba na utru parti, i ladron, i bandidu.

² Kil ku ta yentra na porta i bakiadur di karnel.

³ Porteru ta yabril porta, karnel ta obi si vos; el i ta coma nomi di si karnel, i ta tisi elis pa fora.

⁴ Ora ki tira elis fora, i ta bai dianti; karnel ta sigil, pabia e kunsi si vos,

⁵ ma e ta nega bai tras di kil ke ka kunsi; pa kontrariu, e ta kuri del, pabia e ka kunsi si fála.”

⁶ Jesus da elis e komparason, ma e ka ntindi ke ki mistiba fala elis.

⁷ Jesus torna fala elis: “Na bardadi, N na konta bos kuma i ami ki porta di koral di karnel.

⁸ Tudu kilis ku bin antis di mi i ladron, i bandidu, ma karnel ka kudi elis.

⁹ Ami i porta; kin ku yentra na mi i na salba, i na parsi suma karnel ku na yentra, i na sai, i na oja paja pa kume.

¹⁰ Ladron ta bin son furta, i mata, i dana. Ami N bin pa jinti tene vida, pa e tenel manga del.

¹¹ “Ami i bon bakiadur; bon bakiadur ta sta pruntu pa muri pa si karnel,

¹² ma mpregadu, kil ki ka bakiadur, karnel i ka di sil, si lubu na bin, i ta kuri, i fika karnel; lubu ta rabata karnel, i pajiga elis.

¹³ Mpregadu ta kuri pabia el i mpregadu son, i ka ta mporta ku karnel.

^14-15 Ami i bon bakiadur. Suma ku ña Pape kunsin, ami tambi N kunsi ña Pape. Asin ku N kunsi ña karnel, elis e kunsin; N sta pruntu pa muri pa elis.

¹⁶ N tene inda utru karnel ku ka sedu de koral; tambi i pirsis pa N junta elis; e ta obi ña vos; i ta ten un rebañu son ku un bakiadur.

¹⁷ “Ña Pape aman, pabia N sta pruntu pa da ña vida pa N torna tomal.

¹⁸ Ningin ka ta tiran ña vida, ma i ami propi ku ta dal. N ten puder pa dal, ku puder pa torna tomal. Asin ku ña Pape mandan pa N fasi.”

¹⁹ I bin ten divison entri ŝefis di judeu pabia de palabras.

²⁰ Manga delis fala: “I tene dimoniu; si kabesa ka sta diritu. Pa ke ku bo na obil?”

²¹ Utrus fala: “E palabra i ka di kin ku tene dimoniu. Nta dimoniu pudi yabri uju di un segu?”

Jinti nega Jesus

²² Na Jerusalen i tenba festival di dedikason. I seduba tempu di friu.

²³ Jesus na pasiaba na kasa di Deus, na baranda di Salomon.

²⁴ Ŝefis di judeu rodial, e puntal: “Te kal tempu ku bu na tene no alma riba? Si abo i Kristu, kontanu klaru.”

²⁵ Jesus ruspundi elis: “N konta ja bos; bo ka fia. Kusas ku N fasi na nomi di ña Pape ta testifika di mi,

²⁶ ma abos bo ka fia pabia bo ka sedu ña karnel.

²⁷ Ña karnel ta obi ña vos; ami N kunsi elis; e ta sigin.

²⁸ N ta da elis vida ku ka ta kaba; nunka e ka na pirdi. Ningin ka na rabata elis na ña mon.

²⁹ Ña Pape ku dan elis i mas garandi di ki tudu; ningin ka pudi rabata elis na mon di ña Pape.

³⁰ Ami ku ña Pape, anos i un son.”

³¹ Ŝefis di judeu pega utru bias na pedra pa da Jesus ku el.

³² Jesus fala elis: “Manga di bias N fasi kusas bon bo dianti, na puder di ña Pape; kal de kusas ku pui bos bo na dan ku pedra?”

³³ Judeus ruspundil: “No ka na dau ku pedra pabia di nin un kusa bon ku bu fasi, ma pabia bu na lebsi Deus. Abo i omi, ma bu na coma bu kabesa Deus.”

³⁴ Jesus punta elis: “Deus ka fala na bo lei kuma el i fala kuma abos i deusis?

³⁵ Agora, Skritura ka pudi kabadu ku el. Si lei coma deusis kilis ku Deus manda si palabra pa elis,

³⁶ kuma ku bo fala gora kuma ami, ku ña Pape santifika, i manda pa mundu, N lebsil pabia N fala kuma ami i Fiju di Deus?

³⁷ Si N ka ta fasi tarbaju ku ña Pape mandan pa N fasi, ka bo fia na mi,

³⁸ ma si N ta fasi tarbaju di ña Pape, nin si bo ka fia na mi, bo ta fia na ki tarbaju, pa bo pudi ntindi, bo fia kuma ña Pape sta na mi; ami N sta nel.”

³⁹ Mas un bias e na buskaba manera di prindi Jesus, ma i kapli na se mon.

⁴⁰ I torna riba pa utru banda di riu Jordon, pa lugar nunde ku Jon ta batisaba nel purmeru; i fika la.

⁴¹ Manga di jinti na baiba nunde el; e fala: “I bardadi. Jon ka fasi nin un sinal, ma tudu kusa ki papia aserka de omi i bardadi.”

⁴² Manga di jinti ku bai la fia nel.