Bon Noba di Jesus Kristu ku Jon 1 - BIBLIA - traduson antigu in Krioulo

Palabra di Deus

¹ Antis di mundu kumpudu, kil ki Palabra i tenba ja; i staba ku Deus, i seduba mesmu Deus.

² El i staba ku Deus na kumsada.

³ Deus fasi tudu kusa pa meiu del; i ka ten nada ku fasidu sin el.

⁴ I nel ku vida staba; ki vida i seduba lus di omis.

⁵ Lus numia na sukuru; sukuru ka ngañal.

⁶ I tenba un omi ku Deus manda; si nomi i Jon.

⁷ Ki Jon i bin suma tustumuña pa konta aserka de lus, pa tudu jinti pudi fia pabia di si palabra.

⁸ Jon i ka seduba lus, ma i bin pa konta aserka di ki lus.

⁹ Ki Palabra seduba lus di bardadi ku bin na mundu pa numia tudu jinti.

¹⁰ I staba na mundu; Deus kumpu mundu pa meiu del, ma mundu ka kunsil.

¹¹ I bin pa si propi tera; si jinti ka setal,

¹² ma tudu jinti ku setal, kilis ku fia na si nomi, i da elis diritu di sedu fijus di Deus.

¹³ E ka sedu fijus di Deus pabia e padidu suma di kustumu, nin di se propi vontadi, nin di vontadi di omi, ma e padidu na familia di Deus.

¹⁴ Kil ki Palabra i bida omi; i mora na no metadi, incidu di grasa ku bardadi. No oja si gloria, ku seduba gloria di ki un Fiju son di si Pape.

Tustumuñu di Jon Batista

¹⁵ Jon papia ku vos altu aserka di Jesus, i fala: “Es li i kil ku N fala bos: ‘Kil ku na bin dipus di mi i mas mi, pabia el i seduba purmeru di ki mi.’ ”

¹⁶ Anos tudu no risibi di si rikesa; i danu benson ripitidu.

¹⁷ Lei daduba pa meiu di Moisés; grasa ku bardadi bin pa meiu di Jesus Kristu.

¹⁸ Te aos ningin ka oja Deus; si Fiju un son ku sta juntu ku si Pape i pui pa no kunsil.

¹⁹ Es i tustumuñu di Jon, oca ku ŝefis di judeus di Jerusalen manda saserdotis ku levitas pa e puntal kin ki el.

²⁰ Jon ka nega ruspundi, i konta klaru: “Ami i ka Mesias.”

²¹ E puntal: “Nta abo i kin? Abo i Elias?” I ruspundi: “Ami i ka el.” E punta: “Abo i ki anunsiadur ku dibi di bin?” I ruspundi: “Nau.”

²² E falal: “Kontanu abo i kin, pa no pudi da rasposta pa kilis ku mandanu. Ke ku bu fala di bo propi?”

²³ Jon ruspundi ku palabra di anunsiadur Isaias, i fala: “Ami i vos ku na grita na lala, i fala: ‘Bo filanta kamiñu pa Siñor.’ ”

²⁴ Utru jinti ku mandaduba pa bin papia ku Jon e seduba membrus di un grupu riliẑiosu ku comadu fariseus.

²⁵ E puntal: “Pabia di ke ku bu na batisa si bu ka sedu nin Mesias, nin Elias, nin ki anunsiadur?”

²⁶ Jon ruspundi elis i fala: “Ami N ta batisa ku yagu, ma i ten algin na bo metadi ku bo ka kunsi.

²⁷ Ki algin i na bin dipus di mi. Ami N ka mersi dismanca korda di si sandalia.”

²⁸ E kusas kontisi na Betânia, na utru banda di riu Jordon, nunde ku Jon na batisaba.

²⁹ Oca sol mansi, Jon oja Jesus na bin pa el, i fala: “Ali karnel di Deus ku ta tira pekadu na mundu.

³⁰ I des li ku N falaba: ‘I na bin un omi ña tras ki mas mi, pabia i seduba antis di mi.’

³¹ Ami N ka kunsilba, ma N bin na batisa ku yagu pa pobu di Israel pudi kunsil.”

³² Jon diklara: “N oja Spiritu na ria di seu suma pumba, i para riba del.

³³ Ami N ka kunsilba, ma Deus ku mandan pa N batisa ku yagu i falan: ‘Kil ku bu oja Spiritu para riba del, i el ku na batisa ku Spiritu Santu.’

³⁴ N bin ojal, N diklara kuma el i Fiju di Deus.”

Purmeru disipulus di Jesus

³⁵ Oca sol mansi, Jon staba utru bias na ki kau juntu ku dus di si disipulus.

³⁶ I oja Jesus na pasa, i fala: “Ali karnel di Deus.”

³⁷ Ki dus disipulu obil i na fala; e bai janan tras di Jesus.

³⁸ Jesus vira kabesa pa tras, i oja ki disipulus na sigil, i punta elis: “Ke ku bo na buska?” E ruspundi: “Rabi” (ku signifika Mestre), “nunde ku bu mora?”

³⁹ Jesus ruspundi elis: “Bo bin jubi.” I seduba ja kuas kuatru ora di tardi. E bai, e oja nunde ku Jesus mora, e kabanta ki restu di dia ku el.

⁴⁰ Un di ki dus ku obiba kil ku Jon fala, e bai tras di Jesus, i André, ermon di Simon Pedru.

⁴¹ Purmeru kusa ki fasi, i bai oja si ermon Simon, i falal: “No oja Mesias.” (E palabra signifika Kristu.)

⁴² André leba si ermon Simon pa Jesus. Jesus jubi Simon, i falal: “Abo Simon, fiju di Jon, bu na ba ta comadu Sefas.” (Es signifika Pedru o pedra.)

Jesus coma Filip ku Natanael

⁴³ Oca sol mansi, Jesus na baiba pa Galileia. I kontra ku un omi ku comadu Filip, i falal: “Bin no bai.”

⁴⁴ Filip seduba di Betsaida, prasa di André ku Pedru.

⁴⁵ Filip oja Natanael, i falal: “No oja kil ku Moisés skirbiba na lei aserka del, ku anunsiaduris tambi fala del, ku sedu Jesus di Nazaré, fiju di José.”

⁴⁶ Natanael punta Filip: “Un kusa bon pudi sai di Nazaré?” Filip ruspundil: “Bin, bu ta jubi.”

⁴⁷ Jesus oja Natanael na bin pa el, i falal: “Ali un israelita puru ku ka ten finjimentu.”

⁴⁸ Natanael puntal: “Nunde ku bu kunsin nel?” Jesus ruspundil: “Antis di Filip comau, N ojau oca ku bu staba bas di figera.”

⁴⁹ Natanael ruspundil: “Rabi, abo i Fiju di Deus! Abo i Rei di Israel!”

⁵⁰ Jesus puntal: “Bu fia pabia N falau kuma N ojau bas di figera? Bu na oja kusas mas garandi di ki es.”

⁵¹ Dipus i fala: “N na konta bos bardadi, di gosi pa dianti bo na oja seu yabri; anjus di Deus na subi e na ria riba di Fiju di omi.”