Jeremias 48 - BIBLIA - traduson antigu in Krioulo

Anunsiu kontra Moab

¹ Aserka di Moab: Asin ku SIÑOR ku ten tudu puder, Deus di Israel, fala: “Ai di Nebu, pabia i kabadu ku el. Kiriatain sta na borgoña, pabia i tomadu ja. Kau forti di Misgab sta na borgoña, i batidu.

² Fama di Moab kaba ja. Na Esbon e fasi planu mau kontra el, e fala: ‘Bo bin no kaba ku el, pa i ka sedu mas un nason.’ Abo tambi, prasa di Madmen, bu na kalantadu; spada na serkau.

³ Jinti di Oronain na grita: ‘Violensia! Danu!’

⁴ Moab danadu; bu pudi obi se fijus na cora.

⁵ Na subida pa Luiti jinti na cora pa bai. Na riada di Oronain gritus di foronta obidu.

⁶ Bo kuri! Bo salba bo vida, nin si bo bin sedu suma arvurisiñu dingidu na lala.

⁷ Bu fiansa na bu forsa ku bu rikesa, ma abo tambi bu na tomadu. Bu deus Kemós i na bai katibu, juntu ku si saserdotis ku ŝefis.

⁸ Danadur na bin kontra kada prasa; nin un son ka na kapli. Kobon na danadu tudu ku bulaña, pabia i ami, SIÑOR, ku fala e kusa.

⁹ Bo da asas pa Moab, pabia i na bua pa bai. Si prasas na danadu; ningin ka na mora nelis.

¹⁰ “Maldisuadu i ki algin ku sedu moli na tarbaju di SIÑOR! Maldisuadu i ki algin ku tuji si spada darma sangi!

¹¹ Moab staba diskansadu disna di ocal joven. I sta suma biñu ku sinta, ku ka mudadu pa utru moringu. I ka lebadu katibu; e ku manda si gustu kontinua, si ceru ka muda.

¹² Ma ami, SIÑOR, N fala kuma i na ciga tempu ku N na manda darmaduris ku na darmal na si moringu, tok i kaba tudu; dipus e na kebra moringu.

¹³ Moab na ten borgoña di Kemós, suma ku pobu di Israel tenba borgoña di Betel, se fiansa.

¹⁴ “Omis di Moab, kuma ku bo pudi fala kuma bo sedu forti na gera?

¹⁵ Moab danadu, tudu ku si prasas. Si jovens mas bon e bai pa matansa. Asin ku Rei ku tene nomi di SIÑOR ku ten tudu puder fala.

¹⁶ Kondenason di Moab sta pertu; si mal na bin gosi.

¹⁷ Bo fika tristi ku el, abos tudu ku sta na si roda, ku tudu kilis ku kunsi si fama. Bo fala: ‘Jubi kuma ku e bingala forti di renansa kebra, ki vara bonitu!’

¹⁸ “Abo ku mora na Dibon, ria na bu kau di gloria, bu sinta na tera seku, pabia danadur di Moab bin kontra bo, i dana bu kaus forti.

¹⁹ Abo ku mora na Aroer, firma na kamiñu, bu jubi. Punta omi ku na kuri, ku minjer ku na kapli: ‘Ke ku pasa?’

²⁰ E na ruspundi: ‘Moab sta na borgoña, pabia i batidu. Bo pupa, bo grita, bo anunsia lungu di riu Arnon kuma Moab danadu.’

²¹ “Julgamentu bin riba di bulaña, riba di Olon, Jaza, Mefaat

²² ku Dibon, Nebu, Bet-Diblatain,

²³ Kiriatain, Bet-Gamul, Bet-Meon,

²⁴ Keriot, Bozra, te riba di tudu prasas di tera di Moab, kilis ku lunju ku kilis ku pertu.

²⁵ Puder di Moab kortadu, si brasu kebradu. I ami, SIÑOR, ku fala.

²⁶ “Bo caminti Moab, pabia i lanta kontra SIÑOR. I na rola na si ramasadura; jinti na ril.

²⁷ Nta abo tambi, Moab, bu ka ri di Israel? Nta el i ojadu na metadi di ladrons, ku manda, ora ku bu papia del, bu ta ri?

²⁸ “Abos ku mora na Moab, bo disa prasas, bo bai mora na montañas di pedra, bo sedu suma pumba ku pui si niñu na ponta di boka di kaverna.

²⁹ No obi e na papia di orgulyu di Moab; di bardadi i orgulyosu dimas, i ta ronka, i ta yalsa si ombra, i ta misti sta riba, i ta njuti utru jinti na si korson.

³⁰ Ami, SIÑOR, N kunsi se orgulyu, ma kila i ka nada. I ta ngaba si kabesa, ma tudu i mintida, i ka ten rusultadu.

³¹ Asin N na jimi pa Moab; sin, N na grita pa tudu Moab. N na cora pa omis di Kir-Eres.

³² O prasa di Sibma, N na cora pa bo mas di ki N ta cora pa Jazer. Bu sedu suma pe di uva; bu ramus e bai pa Mar Mortu, e ciga te na mar di Jazer. Danadur kai riba di bu fruta maduru, i toma bu uvas.

³³ Kontentamentu ku alegria tiradu na tera riku di Moab. N pui biñu pa i para kuri na kau di masa uva. Gosi ja, jinti ka ta masa uvas ku gritus di kontentamentu. Gritus pudi ten, ma e ka na sedu di kontentamentu.

³⁴ “I obidu gritu di Esbon te na Elealé ku Jaaz, di Zoar te na Oronain ku Eglat-Selisia, pabia yagu di Ninrin seku.

³⁵ Na Moab N na kaba ku jinti ku ta sakrifika na kaus altu, e kema nsensu pa se deusis.” Asin ku SIÑOR fala.

³⁶ “Asin ña korson na kanta tristi suma flauta pabia di Moab; i na kanta tristi suma flauta pa omis di Kir-Eres, pabia e pirdi tudu rikesa ke junta.

³⁷ Kabesa tudu rapadu, barba tiradu; tudu mon i lañadu; e mara saku.

³⁸ Riba di tudu kasas di Moab, ku na lugaris publiku di prasas, tudu jinti na cora, pabia N kebra Moab, suma jaru ku ningin ka gosta del.” Asin ku SIÑOR fala.

³⁹ “Moab kebrantadu! Sinti kuma ke na grita! Jubi kuma ku Moab vira kosta ku borgoña! Tudu jinti ku sta na roda del e na sinti medu, e na fasi trosa.

⁴⁰ “Ami, SIÑOR, N fala: Inimigu na bua suma agia, i na distindi si asas riba di Moab.

⁴¹ Prasas na tomadu, tudu ku kuartel. Na ki dia korson di omis forti di Moab na torna suma minjer ku na sufri dur di partu.

⁴² Moab na danadu pa i ka sedu mas nason, pabia i lanta kontra SIÑOR.

⁴³ Medu, koba ku armadilia na perau, moradur di Moab.” Asin ku SIÑOR fala.

⁴⁴ “Kin ku kuri di medu i na kai na koba. Kin ku sai na koba i na prindidu pa armadilia, pabia N na tisi Moab si anu di kastigu.” Asin ku SIÑOR fala.

⁴⁵ “Kilis ku kuri e para sin forsa na sombra di Esbon. Ma fugu sai di Esbon; ŝamas sai na prasa di rei Sion, i kema fronteras di Moab ku puder di jinti ku gosta di gera.

⁴⁶ Ai di bo, Moab! Pobu di Kemós pirdi! Bu fijus macu sedu katibu, bu fijus femia e lebadu pa katiberasku.

⁴⁷ “Ma na ultimu tempu N na tira jinti di Moab na katiberasku, N ribanta elis.” Asin ku SIÑOR fala. Es ku sedu julgamentu di Moab.