Jeremias 47 - BIBLIA - traduson antigu in Krioulo

Anunsiu aserka di filisteus

¹ Antis di Faraó ataka Gaza, SIÑOR bin papia ku anunsiadur Jeremias aserka di filisteus, i falal kuma

² asin ku SIÑOR fala: “Jubi! Yagu na lanta la na norti, i na bida korenti ku na darma, i na kubri tera ku tudu ku sta nel, ku prasa ku jinti ku mora nel. Omis na grita; tudu jinti ku mora la e na cora.

³ E na obi baruju di uñas di kabalus forti, ku baruju di karus, ku rodas ku na somna. Papes ka na riba pa juda se fijus, pabia se mon pirdi forsa.

⁴ Dia ciga pa kaba ku tudu filisteus, pa korta di Tiru ku Sidon ki restu di jinti ku pudiba juda elis. SIÑOR na kaba ku filisteus, restu di kilis ku bin di jiu di Kaftor.

⁵ Gaza na rapa si kabesa suma na cur; Askelon na fika mudu. Te kal dia ku restu di jinti di kobon na laña se kurpu na cur?

⁶ “Abos bo fala: ‘O spada di SIÑOR! kal dia ku bu na bin diskansa? Riba pa bu baiña, bu diskansa, bu keta!’

⁷ Ma kuma ki pudi diskansa nkuantu ami, SIÑOR, N dal ordi pa i ataka Askelon, ku kilis ku sta lungu di mar? La ku N dal si tarbaju.”