Jeremias 43 - BIBLIA - traduson antigu in Krioulo

Jeremias lebadu pa Ejitu

¹ Jeremias kaba konta tudu pobu tudu palabras di SIÑOR se Deus, tudu kusa ku SIÑOR mandal pa i konta elis.

² Azarias, fiju di Osaias, ku Joanan, fiju di Kareá, ku tudu omis orgulyosu, e fala Jeremias: “I mintida ku bu na konta! SIÑOR no Deus ka mandau pa bu fala pa ka no yentra na tera di Ejitu pa mora la.

³ Baruk, fiju di Nerias, i el propi ku na cuciu kontra nos pa ntreganu na mon di jinti di Babilonia, pa e matanu o e lebanu katibu pa Babilonia.”

⁴ Asin Joanan, fiju di Kareá, ku tudu ŝefis di tropa ku tudu pobu, e ka seta obdisi ordi di SIÑOR, pa fika na tera di Judá,

⁵ ma Joanan, fiju di Kareá, ku tudu ŝefis di tropa, e leba tudu restu di Judá, kilis ku ribaba di tudu nasons na kau ke pajigaduba, pa e pudi mora na tera di Judá,

⁶ suma tambi omis, minjeris ku mininus, ku fijus femia di rei, ku tudu jinti ku Nebuzaradan, kapiton di guarda, disaba ku Jedalias, fiju di Aikan, fiju di Safan. E leba tambi anunsiadur Jeremias ku Baruk, fiju di Nerias.

⁷ E yentra na tera di Ejitu, pabia e disobdisi ordi di SIÑOR; e bin te na Tafnes.

Anunsiu aserka di Ejitu

⁸ SIÑOR bin papia ku Jeremias na Tafnes, i falal:

⁹ “Toma pedras garandi na mon, bo sukundi elis na lama na baranda di porta di kasa di Faraó na Tafnes, nkuantu utru omis judeu na jubiu.

¹⁰ Bu fala elis: ‘Asin ku SIÑOR ku ten tudu puder, Deus di Israel, fala: N na manda bin Nabukodonosor, rei di Babilonia, ña servu; N na pui si tronu riba de pedras ku N sukundi; el i na distindi si tenda di renansa riba delis.

¹¹ I na bin ataka tera di Ejitu. I na tisi mortu pa kilis ku distinadu pa mortu, katiberasku pa kilis ku distinadu pa katiberasku, spada pa kilis ku distinadu pa spada.

¹² N na sindi fugu na balobas di deusis di Ejitu; Nabukodonosor na kema elis, i na leba ki deusis katibu. Suma ku bakiadur ta kuji karanga na si ropa, asin ku rei Nabukodonosor na kuji ke ki misti na tera di Ejitu. Dipus i na sai la ku vitoria.

¹³ I na kebra statuas di sol, na tera di Ejitu; i na kema balobas di deusis di Ejitu na fugu.’ ”