Jeremias 42 - BIBLIA - traduson antigu in Krioulo

Jeremias konsija jinti pa ka e bai pa Ejitu

¹ Tudu ŝefis di tropa, ku Joanan, fiju di Kareá, ku Jezanias, fiju di Osaias, ku tudu pobu, garandi ku pikininu, e ciga

² nunde anunsiadur Jeremias, e falal: “No bin pidiu pa bu ten pasensa, bu roga SIÑOR bu Deus pa nos ku sobra, pabia no seduba ciu, ma gosi no sobra puku, suma ku bu na oja.

³ Ora pa SIÑOR bu Deus pudi mostranu kamiñu ku no dibi di yanda, ku ke ku no dibi di fasi.”

⁴ Anunsiadur Jeremias fala elis: “N obi; N na ora SIÑOR bo Deus suma ku bo pidin; tudu ku SIÑOR fala, N na konta bos el; N ka na sukundi bos nada.”

⁵ E fala Jeremias: “SIÑOR ta sedu tustumuña fiel, di bardadi, kontra nos, si no ka fasi konformi tudu ku SIÑOR bu Deus mandau pa bu kontanu.

⁶ Si ordi sabi o i ka sabi, no na obdisi SIÑOR no Deus, kil ku no mandau pa el. No na obdisil pa kusas pudi kurinu diritu.”

⁷ Des dia pasa; SIÑOR bin papia ku Jeremias.

⁸ I coma Joanan, fiju di Kareá, ku tudu ŝefis di tropa ku staba ku el, ku tudu pobu, pikininu ku garandi.

⁹ I fala elis: “Asin ku SIÑOR, Deus di Israel, fala, kil ku bo mandan pa N leba bo pididu si dianti:

¹⁰ ‘Si bo fika ne tera, N na kumpu bos, N ka na bati bos; N na firmanta bos, N ka na rinka bos, pabia N sta tristi pa mal ku N fasi bos.

¹¹ Ka bo medi rei di Babilonia ku bo na sinti medu del; ami, SIÑOR, N fala: Ka bo ten medu del, pabia N sta ku bos pa salba bos, pa libra bos na si mon.

¹² N na mostra bondadi pa bos, pa el i pudi mostra bos si bondadi, i ribanta bos na bo tera.’

¹³ “Ma si bo ka obdisi SIÑOR bo Deus, bo fala kuma bo ka na fika ne tera,

¹⁴ bo fala kuma nau, bo na bai pa Ejitu, nunde ku bo ka na oja gera, nin obi toku di korneta, nin bo ka na tene fomi; la ku bo na fika,

¹⁵ ne kasu, bo obi palabra di SIÑOR, abos ku sobra di Judá. Asin ku SIÑOR ku ten tudu puder, Deus di Israel, fala: ‘Si bo pui sintidu pa bai pa Ejitu, tok bo bai sinta la,

¹⁶ ki spada ku bo medi i na yangasa bos la; fomi ku bo medi i na bai bo tras pa Ejitu; la ku bo na muri.

¹⁷ Asin tudu jinti ku pui sintidu pa bai sinta na Ejitu, e na muri ku spada, fomi o duensa. I ka na sobra nin un son delis ku na kapli di mal ku N na manda pa elis.’

¹⁸ Asin ku SIÑOR ku ten tudu puder, Deus di Israel, fala: ‘Suma ku forsa di ña raiba i darmadu riba di moraduris di Jerusalen, asin ku ña raiba na darmadu riba di bos ora ku bo yentra na Ejitu. Jinti na panta pabia di bos, e na njuti bos, e fasi bos trosa, e maldisua bos. Bo ka na oja mas e kau.’

¹⁹ “Abos ku sobra di Judá, SIÑOR fala bos: ‘Ka bo yentra na Ejitu.’ Bo pudi ten sertesa kuma N na avisa bos aos.

²⁰ Bo na ngana bo kabesa. Bo mandan pa SIÑOR bo Deus, bo falan: ‘Roga SIÑOR no Deus pa nos. Bu na kontanu tudu ku SIÑOR no Deus fala; no na fasil.’

²¹ N konta bos aos ke ki fala, ma inda bo ka obdisi SIÑOR bo Deus na tudu ki mandan pa N konta bos.

²² Asin bo pudi sibi kuma bo na muri ku spada, fomi o duensa na ki kau nunde ku bo misti mora nel.”