Jeremias 41 - BIBLIA - traduson antigu in Krioulo

¹ Na setimu mis, Ismael, fiju di Netanias, fiju di Elisama, di familia di rei, ku des omi, kapitons di rei, e bai pa Jedalias, fiju di Aikan, na Mizpá. Oca ke na kume juntu la,

² Ismael, fiju di Netanias, ku ki des omi ku staba ku el, e lanta e mata Jedalias, fiju di Aikan, fiju di Safan, ku spada. Asin e mata kil ku rei di Babilonia pui suma gubernadur di tera.

³ Ismael mata tambi tudu judeus ku staba ku Jedalias na Mizpá, tambi ku utru omis di tropas di Babilonia ku ojadu la.

⁴ Oca ku sol mansi ki mata Jedalias, kontra jinti ka sibiba inda,

⁵ oitenta omi bin di Siken, Siló ku Samaria, ku barba rapadu, ropa rumpidu, ku kurpu lañadu; e tisi na se mon ofertas di kumida ku nsensu pa leba na kasa di SIÑOR.

⁶ Ismael, fiju di Netanias, i sai na Mizpá, i na cora pa bai da elis kontrada. Oca ki ciga nunde elis, i fala elis: “Bo bin pa Jedalias, fiju di Aikan.”

⁷ Oca ke bai te na metadi di prasa, Ismael, fiju di Netanias, ku omis ku staba ku el, e mata elis, e bota elis na un fonti.

⁸ Des di ki oitenta omi fala Ismael: “Ka bu matanu, pabia no tene manga di trigu ku sevada ku azeiti ku mel sukundidu na matu.” Pabia di kila i disa elis, i ka mata elis juntu ku se ermons.

⁹ Ki fonti nunde ku Ismael bota tudu difuntus di omis ki mata, fora di Jedalias, i sedu ki mesmu ku rei Asa koba oca i na difindi kontra Baasa, rei di Israel. I ki fonti propi ku Ismael, fiju di Netanias, inci ku difuntus.

¹⁰ Ismael leba katibu fijus femia di rei ku tudu restu di jinti ku fikaba na Mizpá, ku Nebuzaradan, kapiton di guarda, ntregaba Jedalias, fiju di Aikan; i leba elis katibu, i bai pa pasa pa tera di Amon.

Joanan libra katibus

¹¹ Oca Joanan, fiju di Kareá, ku tudu ŝefis di tropa ku staba ku el, e obi tudu mal ku Ismael, fiju di Netanias, fasi,

¹² e toma tudu se omis, e bai geria kontra Ismael, fiju di Netanias, e ojal lungu di lagua garandi na Jibeon.

¹³ Oca ku tudu jinti ku staba ku Ismael oja Joanan, fiju di Kareá, ku tudu ŝefis di tropa ku bin ku el, e kontenti.

¹⁴ Asin tudu ki jinti ku Ismael lebaba katibu di Mizpá e rabida e bai pa Joanan, fiju di Kareá,

¹⁵ ma Ismael, fiju di Netanias, kapli di Joanan, el ku mas oitu omi, e bai pa fijus di Amon.

Jinti kuri pa Ejitu

¹⁶ Joanan, fiju di Kareá, i toma tudu ŝefis di tropa ku staba ku el, ku tudu jinti ku Ismael, fiju di Netanias, leba katibu di Mizpá, dipus ki mata Jedalias, fiju di Aikan. Na se metadi i tenba omis di gera, minjeris, mininus ku funsionarius — kilis ku Joanan kaplinti na mon di Ismael na Jibeon.

¹⁷ E pega kamiñu, e bai panti na Jerut-Kiman ku sta pertu di Belen, pa e pudi pasa pa Ejitu,

¹⁸ pabia e tenba medu di jinti di Babilonia, suma ku Ismael, fiju di Netanias, mata Jedalias, fiju di Aikan, ku rei di Babilonia pui gubernadur na tera.